மும்பையில் நேற்றிரவு பயங்கரவாதிகள் நடத்திய தாக்குதலைத் தொடர்ந்து சென்னை நகரில் பாதுகாப்பு ஏற்பாடுகள் பலப்படுத்தப்பட்டுள்ளன.
மும்பையில் பயங்கரவாதிகள் நடத்திய தாக்குதலில் 100க்கும் அதிகமானவர்கள் பலியானர்கள், 200க்கும் மேற்பட்டவர்கள் படுகாயமடைந்தனர்.
இந்த தாக்குதலையடுத்து சென்னை நகரில் பாதுகாப்பு ஏற்பாடுகள் பலப்படுத்தப்பட்டுள்ளன. அயல்நாட்டினர் தங்கியுள்ள விடுதிகள், நட்சத்திர ஹோட்டல்களில் பாதுகாப்பு போடப்பட்டுள்ளது.
விடுதிகள், ஹோட்டல்கள் உள்ளிட்ட தங்கும் இடங்களில் தங்கியிருப்பவர்கள் பற்றிய விவரங்களை சேகரித்து வருகின்றனர்.
பொதுமக்கள் அதிகமாக கூடும் வழிபாட்டுத் தலங்கள், ரயில் நிலையங்கள் உள்ளிட்ட முக்கிய பகுதிகளில் பாதுகாப்புப் பணியில் அதிரடிப்படை வீரர்கள் ஈடுபடுத்தப்பட்டனர்.
சென்னை மீனம்பாக்கத்தில் உள்ள உள்நாட்டு, அயல்நாட்டு விமான நிலையங்களிலும் பாதுகாப்பு பலப்படுத்தப்பட்டுள்ளது. மத்திய தொழில் பாதுகாப்புப் படையினர் தீவிர கண்காணிப்பு நடவடிக்கைகளை மேற்கொண்டுள்ளனர்.
சென்னை நகருக்கு வரும் வழிகளில் அமைக்கப்பட்டுள்ள சோதனைச் சாவடிகள் தீவிர கண்காணிப்பு ஏற்பாடு செய்யப்பட்டுள்ளது. வெளியிடங்களில் இருந்து வருபவர்களிடம் விசாரணை நடத்தப்படுவதோடு அவர்களின் உடைமைகளும் சோதனையிடப்படுகின்றன.
மும்பையில் தாக்குதல் நடத்திய பயங்கரவாதிகள் தமிழகத்திற்குள் ஊடுருவி விடாமல் தடுக்கும் பொருட்டு முக்கிய நகரங்களிலும் கண்காணிப்பு தீவிரப்படுத்தப்பட்டுள்ளது.
