நிஷா புயல் இன்று காலை கரையை கடக்கும் நிலையில், தொடர் மழை காரணமாக வியாழக்கிழமையும் பள்ளிகளுக்கு விடுமுறை அறிவிக்கப்பட்டுள்ளது.
தஞ்சாவூர், கடலூர், புதுக்கோட்டை, கரூர், திருச்சி, அரியலூர், வேலூர் ஆகிய மாவட்டங்களில் பள்ளிகள், கல்லூரிகளுக்கு வியாழக்கிழமையும் விடுமுறை அறிவிக்கப்பட்டுள்ளது.
சென்னை, திருவள்ளூர், காஞ்சிபுரம், விழுப்புரம், பெரம்பலூர் ஆகிய மாவட்டங்களிலும், புதுவை மாநிலத்திலும் பள்ளிகளுக்கு விடுமுறை அறிவிக்கப்பட்டுள்ளது.
சென்னை அண்ணாபல்கலைக்கழகத்தின் கட்டுப்பாட்டில் உள்ள அனைத்து பொறியியல் கல்லூரிகளில் தேர்வுகள் தள்ளிவைக்கப்பட்டு பல்கலைக்கழகம் மற்றும் அனைத்து கல்லூரிகளுக்கும் இன்றும், நாளையும் விடுமுறை விடப்பட்டுள்ளது.
நவம்பர் 26, 27, 28 ஆகிய தேதிகளில் நடைபெறுவதாக இருந்த பருவத் தேர்வுகள் முறையே டிசம்பர் 17, 18, 20 ஆகிய தேதிகளில் நடத்தப்படும் என அண்ணா பல்கலைக்கழக தேர்வு கட்டுப்பாட்டு அதிகாரி வி.ஜெயபால் வெளியிட்ட செய்திக்குறிப்பில் தெரிவித்துள்ளார்.
இதேபோல், சென்னைப் பல்கலைக்கழக இணைப்புக் கல்லூரிகளில் நவம்பர் 26, 27, 28 ஆகிய தேதிகளில் நடைபெறுவதாக இருந்த பருவத் தேர்வுகள் தள்ளி வைக்கப்பட்டுள்ளன.
இந்த தேர்வுகளுக்கான மாற்று தேதிகள் விரைவில் அறிவிக்கப்படும் என்று பல்கலைக்கழக செய்திக் குறிப்பில் தெரிவிக்கப்பட்டுள்ளது.
