இந்திய கடல்சார் பல்கலைக்கழக புதிய கட்டடங்களுக்கு தமிழக முதலமைச்சர் கருணாநிதி விரைவில் அடிக்கல் நாட்ட உள்ளார் என்று பல்கலைக் கழக துணைவேந்தர் டாக்டர் பி.விஜயன் தெரிவித்தார்.
சென்னையில் செய்தியாளர்களிடம் பேசிய அவர், தேசிய கடல்சார் பல்கலைக்கழகம் செம்மஞ்சேரியில் உள்ள 300 ஏக்கர் நிலப்பரப்பில் 100 ஏக்கரில் அமையவுள்ளது. உலகத்தரம் வாய்ந்த இந்த பல்கலைக்கழகம் ரூ.245 கோடி செலவில் அமைக்கப்படும். இந்த பல்கலைக்கழகத்திற்காக மும்பை, கொல்கத்தா, விசாகப்பட்டினம் ஆகிய நகரங்களின் வளாகங்களும் அமைக்கப்படவுள்ளன.
ஆரம்பத்தில் இந்திய கடல்சார் பல்கலைக்கழகத்தில் 8 துறைகள் துவக்கப்படவுள்ளன. அவை, துறைமுக நிர்வாகம், கடல்மைல் அறிவியல், கடல்சார் பொறியியல், வர்த்தக பள்ளி, கடல்சார் அறிவியல், கடல் துறை சட்டங்கள், கப்பல் வடிவமைப்பு மற்றும் கப்பல் கட்டுதல், உள்நாட்டு நீர்வழிப் போக்குவரத்து ஆகியவையாகும்.
இந்தத் துறைகள் மூலம் இளங்கலை, முதுகலை, ஆராய்ச்சி படிப்புகள் வழங்கப்படவுள்ளது. தற்போது இந்த தேசிய கடல்சார் மையம் அளித்து வரும் துறைமுகம், கடல் சார்பான குறுகிய கால படிப்புகள், கடல் மைல் அறிவியல், கடல்சார் பொறியியல் ஆகிய பிரிவுகளில் பட்டப் படிப்புகள் இனிமேல் பல்கலைக்கழகத்தின் கீழ் கொண்டுவரப்படும்.
தவிர பல்வேறு அயல்நாட்டுப் பல்கலைக்கழகத்துடன் இணைந்து இளங்கலை, முதுகலை பட்டப் படிப்புகளும் வழங்க திட்டமிடப்பட்டுள்ளது. இது தவிர பெங்களூரூ ஐஐஎம் உடன் இணைந்து முதுநிலை கடலோர அதிகாரிகளுக்கு நிர்வாகத்தில் சான்றிதழ் படிப்பும், ஐஐஎம் அகமதாபாத்துடன் இணைந்து கடல்சார் நிர்வாகத்தில் (அதிவிரைவு) எம்பிஏ பட்டமும் வழங்க திட்டமிடப்பட்டுள்ளது.
நிர்வாகக் குழு அமைப்பது, பாடத்திட்டங்கள் இறுதி செய்வது, மாணவர் சேர்க்கைக்கான விதிமுறை உள்ளிட்ட பல்வேறு பணிகள் வேகமாக நடைபெற்று வருகின்றன. இந்திய கடல்சார் பல்கலைக்கழகத்தில் கல்விப் பணிகள் வரும் கல்வியாண்டிலேயே துவங்கிவிடும். மாணவர் சேர்க்கையில் அரசின் ஒதுக்கீட்டு வழிமுறைகள் முழுமையாக கடைப்பிடிக்கப்படும்.
செம்மஞ்சேரியில் உள்ள 300 ஏக்கர் நிலப்பரப்பில் பல்கலைக்கழகத்திற்கு 106 ஏக்கர் போக மீதியுள்ள 200 ஏக்கர் நிலத்தில் ரூ.1500 கோடி செலவில் கடல்சார் வணிக வளாகம் அமைக்கப்படவுள்ளது. அரசு, தனியார் கூட்டு முயற்சியுடன் இந்த திட்டம் நிறைவேற்றப்படும்.
இந்த வளாகத்தில் அருங்காட்சியகம், கலைக்கூடம், கடல்வாழ் உயிரின வளர்ப்பு மையம், வணிக வளாகம், கேட்டரிங் கல்லூரி, 5 நட்சத்திர உணவகம், 15 ஆயிரம் பேர் ஒரே நேரத்தில் அமரக் கூடிய அளவுக்கு அதிநவீன மாநாட்டு கூடம் ஆகியவை அமைக்கப்படவுள்ளன.
பல்கலைக்கழகம், வணிக வளாகம் உள்ளிட்ட புதிய கட்டடப் பணிகள் வரும் 2010-க்குள் முடியும் என்று எதிர்பார்க்கப்படுகிறது என்றார் இந்திய கடல்சார் பல்கலைக்கழக துணைவேந்தர் டாக்டர் பி விஜயன்.
