சென்னை புழலில் வைக்கப்பட்டுள்ள அம்பேத்கர் சிலையை மர்ம ஆசாமிகள் அவமரியாதை செய்ததையடுத்து அப்பகுதி மக்கள் மறியலில் ஈடுபட்டனர். இதனால் அங்கு பெரும் பதற்றம் ஏற்பட்டுள்ளது.
புழல் கேம்ப் ஜி.என்.டி. சாலையில் வைக்கப்பட்டுள்ள அம்பேத்கர் சிலை மீது இன்று அதிகாலை மர்ம கும்பலைச் சேர்ந்த சிலர், சிலையை அவமதிக்கும் விதமாக பெயிண்டால் சிலையின் நெற்றியில் நாமம் போட்டும் மற்றும் உடல் பகுதியில் ராம் என்று எழுதியும் சென்றுள்ளனர்.
இதனைக் கண்ட அப்பகுதி மக்கள் இதற்கு கடும் கண்டனம் தெரிவித்ததோடு, மர்ம ஆசாமிகளை கைது செய்யக்கோரி சாலை மறியலில் ஈடுபட்டனர். இதனால் அப்பகுதியில் பெரும் பதற்றமும், பரபரப்பும் ஏற்பட்டது.
இதையடுத்து அங்கு விரைந்த காவல்துறையினர் அவர்களுடன் பேச்சுவார்த்தை நடத்தி சம்பந்தப்பட்டவர்களை கைது செய்வதாக உறுதியளித்ததையடுத்து மறியல் கைவிடப்பட்டது.
இந்த திடீர் மறியல் காரணமாக அப்பகுதியில் போக்குவரத்து பெருமளவில் பாதிக்கப்பட்டது. ஏராளமான காவல்துறையினர் குவிக்கப்பட்டிருந்தனர்.
