தங்களின் கோரிக்கைகள் நிறைவேறும்வரை கரும்பு ஆலைகளுக்கு கரும்புகளைக் கொடுப்பதில்லை என்று ஈரோடு மாவட்ட கரும்பு விவசாயிகள் முடிவு செய்துள்ளனர்.
கரும்புக்கு டன்னுக்கு 2 ஆயிரம் ரூபாய் வழங்க வேண்டும், கரும்புக்கான நிலுவைத் தொகையை உடனே வழங்க வேண்டும் உள்ளிட்ட கோரிக்கைகளை வலியுறுத்தி, பவானியை அடுத்த ஆப்பக்கூடல் சக்தி சர்க்கரை ஆலை முன் விவசாயிகள் சமீபத்தில் மறியல் போராட்டத்தில் ஈடுபட்டனர்.
இந்த மறியல் போராட்டத்திற்கு தமிழக விவசாயிகள் சங்கத்தின் மாவட்ட தலைவர் வெங்கடாசலம் தலைமை தாங்கினார்.
தமிழக விவசாயிகள் சங்கம், இடதுகரை பாசன விவசாயிகள் சங்கம், தடப்பள்ளி, அரக்கன்கோட்டை விவசாயிகள் சங்கம் உள்ளிட்ட சங்கங்களை சேர்ந்த 500-க்கும் மேற்பட்ட கரும்பு விவசாயிகள் இந்த சாலைமறியலில் பங்கேற்றனர்.
மறியலில் ஈடுபட்ட விவசாயிகளுடன் அதிகாரிகள் பேச்சுவாரத்தை நடத்தினர். ஆனால் இதில் உடன்பாடு ஏற்படாததால், கோரிக்கைகள் நிறைவேறும்வரை சர்க்கரை ஆலைக்கு கரும்பு கொடுப்பதில்லை என விவசாயிகள் முடிவு செய்திருப்பதாக தெரிகிறது.
