மன்னார்குடி அருகே உள்ள சேரன்குளம் கிராமத்தில் தமிழக முன்னாள் முதல்வர் எம்.ஜி.ஆரின் முழு உருவ சிலையை மர்ம கும்பலைச் சேர்ந்த சிலர் உடைத்துள்ளனர். இதனால் அங்கு பதற்றம் ஏற்பட்டுள்ளது.
மன்னார்குடியில் இருந்து பெருகவாழ்ந்தான் செல்லும் சாலையில் வைக்கப்பட்டுள்ள எம்.ஜி.ஆரின் முழு உருவ சிமெண்ட் சிலையின் கைப்பகுதியை மர்ம கும்பலைச் சேர்ந்த சிலர் நேற்றிரவு உடைத்து சேதப்படுத்தியுள்ளனர்.
இதுபற்றி அறிந்த அப்பகுதியைச் சேர்ந்த அ.இ.அ.தி.மு.க. நிர்வாகிகள் மற்றும் தொண்டர்கள் அங்கு விரைந்து வந்து எம்.ஜி.ஆர். சிலை உடைக்கப்பட்டதற்கு கடும் கண்டம் தெரிவித்ததோடு இதுபற்றி காவல்துறையில் புகார் செய்தனர்.
இதையடுத்து அங்கு வந்த காவல்துறையினர் இதுபற்றி வழக்குப் பதிவு செய்து சிலையை உடைத்து சேதப்படுத்திய மர்ம கும்பலை வலை வீசி தேடி வருகின்றனர். இந்த சிலை உடைப்பு சம்பவத்தால் அப்பகுதியில் சிறிது நேரம் பரபரப்பு ஏற்பட்டதாக தவல்கள் தெரிவிக்கின்றன.
