சென்னை : இலங்கையில் அப்பாவி தமிழ் மக்கள் பாதிக்கப்படுவதை கண்டித்து நடிகர், நடிகைகள் இன்று உண்ணாவிரதம் இருக்கின்றனர். முன்னணி நடிகர்களான ரஜினிகாந்த், கமலஹாசன் ஆகியோர் பங்கேற்கின்றனர்.
இது தொடர்பாக தென்னிந்திய நடிகர் சங்கத் தலைவர் சரத்குமார், பொதுச்செயலர் ராதாரவி ஆகியோர் வெளியிட்டுள்ள அறிக்கையில், இலங்கையில் பாதிக்கப்பட்டுள்ள அப்பாவி தமிழ் மக்களுக்கு உதவி செய்யும் வகையிலும், தங்களுடைய உணர்வை பதிவு செய்யும் வகையிலும், தென்னிந்திய நடிகர் சங்க உறுப்பினர்கள் அனைவரும், தென்னிந்திய நடிகர் சங்க வளாகத்தில் சனிக்கிழமை காலை 8 மணி முதல் மாலை 4 மணி வரை உண்ணாவிரதம் மேற்கொள்ள இருக்கிறார்கள்.
இதில் ரஜினிகாந்த், கமலஹாசன் உள்பட முன்னணி நடிகர்களும் கலந்து கொள்கிறார்கள். பொதுமக்கள் எந்தவித இடைஞ்சலும் இல்லாமல், உண்ணாவிரதம் இருப்பவர்களை பார்த்து செல்ல ஏற்பாடுகள் செய்யப்பட்டுள்ளது.
பொதுமக்கள் அபிபுல்லா ரோடு, பிரதான சாலை வழியாக உள்ளே வந்து, வித்யோதயா 1-வது தெரு வழியாக வெளியே செல்ல ஏற்பாடுகள் செய்யப்பட்டுள்ளது. தென்னிந்திய நடிகர் சங்க நிர்வாகிகள், சென்னை பெருநகர ஆணையரை நேரில் சந்தித்து, அனுமதி, பாதுகாப்பு ஏற்பாடு, போக்குவரத்து மாற்று ஏற்பாடுகள் செய்ய நேரில் மனு கொடுத்துள்ளனர்'' என்று அவர்கள் கூறியுள்ளனர்.
