இலங்கைத் தமிழர்கள் தாக்கப்படுவதை நிரந்தரமாக நிறுத்திட வேண்டும் என்ற அனைத்துக்கட்சி கோரிக்கைகளை உடனடியாக மத்திய அரசு நிறைவேற்றக் கோரி வரும் 25ஆம் தேதி ராமேஸ்வரத்தில் உண்ணாவிரத போராட்டம் நடைபெறும் என்று தமிழ்நாடு தொடக்கப்பள்ளி ஆசிரியர்மன்ற பொதுச்செயலாளர் மீணாட்சிசுந்தரம் தெரிவித்துள்ளார்.
இது தொடர்பாக அவர் இன்று வெளியிட்டுள்ள அறிக்கையில், ''இலங்கைத் தமிழர்களும், தமிழக மீனவர்களும் தாக்கப்படுவதை நிரந்தரமாக நிறுத்திட இந்திய அரசு 2 வார காலத்திற்குள் நடவடிக்கை எடுக்காவிட்டால் தமிழக நாடாளுமன்ற உறுப்பினர்கள் அனைவரும் பதவி விலகிட நேரிடும் என்று முடிவெடுத்து அறிவித்துள்ள அனைத்துக்கட்சி தலைவர்களின் இன உணர்வை, எழுச்சிப் பெருக்கை, தியாகத்தன்மையை தமிழ்நாடு தொடக்கப்பள்ளி ஆசிரியர் மன்றம் நெஞ்சார வரவேற்றுப் பாராட்டுகிறது.
தமிழ்ச் சமுதாயத்தின் ஒரு அங்கமான ஆசிரியப் பெருமக்களின் சார்பாக அனைத்துக்கட்சியின் அதே கோரிக்கைகளை உடனடியாக நிறைவேற்றுமாறு மத்திய அரசை வற்புறுத்தி வரும் 25ஆம் தேதி காலை 8 மணிமுதல் மாலை 5 மணி வரை ராமேஸ்வரம் கடற்கரையில் என் தலைமையில் 5 ஆயிரம் ஆசிரியப் பெருமக்கள் எழுச்சியோடு கலந்து கொள்ளும் மாபெரும் உண்ணாவிரதப் போராட்டம் நடக்கிறது.
இந்த போராட்டத்தில் ஆசிரியர் மன்றம், தமிழ்நாடு அரசு உதவி பெறும் பள்ளிகளில் இடைநிலை ஆசிரியர் இடங்களில் பணியாற்றும் பட்டதாரி ஆசிரியர் கழகம், தமிழகக் கல்விப்பணி அனைத்து ஆசிரியர்கழகம், தமிழ்நாடு வேளாண்மைத் தொழிலாசிரியர் சங்கம், மதுரை மாநகராட்சி அனைத்தாசிரியர் மன்றம் உள்ளிட்டப் பல்வேறு ஆசிரியர் சங்கங்கள் இயக்க வேறுபாடின்றி இன உணர்வோடு கலந்து கொள்ளும்'' என்று மீனாட்சிசுந்தரம் கூறியுள்ளார்.
