உத்தபுரம் பிரச்சனை தொடர்பாக மார்க்சிஸ்ட் கம்யூனிஸ்ட் கட்சியின் மாநில செயலர் என்.வரதராஜன், முதலமைச்சர் கருணாநிதியை சென்னை தலைமைச் செயலகத்தில் இன்று சந்தித்து பேசினார்.
சுமார் 30 நிமிடங்கள் நடந்த இந்த சந்திப்பின் போது, உத்தபுரம் கிராமத்தில் இரு சமுதாய மக்களிடையே நிலவி வரும் மோதல் போக்குகள் குறித்தும், அதில் அரசு தலையிட்டு தீர்வு காண வேண்டும் என்பது குறித்தும் வலியுறுத்தப்பட்டுள்ளது.
இந்த சந்திப்பின்போது, கட்சியின் செயற்குழு உறுப்பினரும், தீண்டாமை ஒழிப்பு கமிட்டியின் தலைவருமான சம்பத், சட்டமன்ற உறுப்பினர் பாலபாரதி ஆகியோர் உடன் இருந்தனர்.
முதல்வரை சந்தித்து விட்டு வெளியே வந்த வரதராஜன் செய்தியாளர்களிடம் பேசுகையில், ''உத்தபுரத்தில் இரு பிரிவினரிடையே உள்ள பிரச்சனைக்கு சுமுக தீர்வு காணவும், அமைதி திரும்ப வேண்டும் என்று முதல்வரை கேட்டுக்கொண்டுள்ளோம். அவரும் நடவடிக்கைகள் மேற்கொள்ளப்படும் என உறுதியளித்துள்ளார் என்றார்.
