ஒரு ரூபாய்க்கு ஒரு கிலோ அரிசி திட்டம்: சென்னையில் 15ஆம் தேதி கருணாநிதி தொடங்கி வைக்கிறார்!
, திங்கள், 8 செப்டம்பர் 2008 (16:58 IST)
பேரறிஞர் அண்ணாவின் நூற்றாண்டு விழாவையொட்டி சென்னையில் வரும் 15ஆம் தேதி கிலோ அரிசி 1 ரூபாய்க்கு வழங்கும் திட்டத்தை முதலமைச்சர் கருணாநிதி தொடங்கி வைக்கிறார். 16ஆம் தேதி மற்ற மாவட்டங்களில் அமைச்சர்கள் தொடங்கி வைக்கிறார்கள்.
இது தொடர்பாக தமிழக அரசு இன்று வெளியிட்டுள்ள செய்திக்குறிப்பில், தமிழகத்திலுள்ள நியாய விலைக் கடைகள் மூலம் குடும்ப அட்டைதாரர்களுக்குக் கிலோ அரிசி 1 ரூபாய் விலையில் வழங்கும் திட்டம் பேரறிஞர் அண்ணா பிறந்த நூற்றாண்டு நாளாகிய வரும் 15ஆம் தேதி அன்று தமிழகம் முழுவதும் செயல்படுத்தப்படும் என்று முதலமைச்சர் கருணாநிதி அறிவித்தார்.அதன்படி சென்னை, இராதாகிருஷ்ணன் நகர் சட்டமன்றத் தொகுதியில் வரும் 15ஆம் தேதி காலை 9 மணிக்கு நடைபெறும் விழாவில், கிலோ அரிசி 1 ரூபாய் வழங்கும் திட்டத்தை முதலமைச்சர் கருணாநிதி தொடங்கி வைக்கிறார்.வரும் 16ஆம் தேதி அன்று சென்னை மாவட்டத்திலுள்ள 13 சட்டமன்றத் தொகுதிகளிலும், தமிழகத்தின் மற்ற அனைத்து மாவட்டங்களிலும் நடைபெறும் விழாக்களில் தமிழகத்தைச் சேர்ந்த மத்திய அமைச்சர்களும், தமிழக அமைச்சர்களும், சென்னை மாநகர மேயரும் கலந்து கொண்டு கிலோ அரிசி 1 ரூபாய்க்கு வழங்கும் திட்டத்தைத் தொடங்கி வைக்கிறார்கள்.
சென்னை துறைமுகத்தில் நிதித்துறை அமைச்சர் அன்பழகன், அண்ணாநகர், புரசைவாக்கத்தில் ஆற்காடு வீராசாமி, ஆயிரம் விளக்கு, சேப்பாக்கத்தில் மு.க.ஸ்டாலின், எழும்பூர், பூங்காநகரில் பரிதி இளம்வழுதி, பெரம்பூரில் கே.பி.பி.சாமி, தியாகராயநகரில் மேயர் சுப்பிரமணியம், சைதாப்பேட்டை, மயிலாப்பூரில் மத்திய அமைச்சர் டி.ஆர்.பாலு, திருவல்லிக்கேணியில் திட்டக் குழு துணைத் தலைவர் மு.நாகநாதன், ராயபுரத்தில் மத்திய அமைச்சர் ராதிகா செல்வி ஆகியோர் தொடங்கி வைக்கிறார்கள்.தஞ்சாவூரில் கோ.சி.மணி, சேலத்தில் வீரபாண்டி ஆறுமுகம், வேலூரில் துரைமுருகன், விழுப்புரத்தில் பொன்முடி, திருச்சியில் கா.நா. நேரு, கடலூரில் எம்.ஆர்.கே. பன்னீர்செல்வம், கோயம்புத்தூரில் பொங்கலூர் பழனிச்சாமி, திண்டுக்கல்லில் பெரியசாமி, கன்னியாகுமரியில் சுரேஷ் ராஜன், திருவண்ணாமலையில் எ.வ.வேலு.இராமநாதபுரத்தில் சுப.தங்கவேலன், விருதுநகரில் கே.கே.எஸ்.எஸ்.ஆர்.இராமச்சந்திரன், காஞ்சிபுரத்தில் தா.மோ.அன்பரசன், சிவகங்கையில் கே.ஆர்.பெரியகருப்பன், தேனியில் தங்கம் தென்னரசு, அரியலூரில் எஸ்.என்.எம் உபயதுல்லா, திருநெல்வேலியில் டி.பி.எம். மைதீன்கான், கரூரில் என்.செல்வராஜ், ஈரோட்டில் வெள்ளக்கோவில் சாமிநாதன்.
தூத்துக்குடியில் கீதா ஜீவன், மதுரையில் தமிழரசி, திருவள்ளூரில் கே.பி.பி.சாமி, திருவாரூரில் மதிவாணன், நீலகிரியில் இராமச்சந்திரன், நாமக்கல்லில் வி.பி.துரைசாமி, பெரம்பலூரில் மத்திய அமைச்சர் ஆ.இராசா, நாகப்பட்டினத்தில் மத்திய அமைச்சர் எஸ்.ரகுபதி, புதுக்கோட்டையில் மத்திய அமைச்சர்கள் எஸ்.எஸ். பழனி மாணிக்கம், தருமபுரி மத்திய அமைச்சர் வேங்கடபதி, கிருஷ்ணகிரி மத்திய அமைச்சர் சுப்புலட்சுமி ஜெகதீசன் ஆகியோர் தொடங்கி வைக்கிறார்கள் என்று தெரிவிக்கப்பட்டுள்ளது.
