சிறிலங்க கடற்படையினரால் பிடித்துச் செல்லப்பட்ட நாகப்பட்டனம் மாவட்டத்தை சேர்ந்த பத்து மீனவர்கள் விடுக்கப்பட்டுள்ளனர் என்று மாவட்ட ஆட்சியர் தெரிவித்துள்ளார்.
நாகப்பட்டினம் மாவட்டம் கீச்சாம்குப்பத்தை சேர்ந்த ஜெயராமன், அப்பாதுரை, ராஜாராம், ரத்தினகுமார், ராஜீவ்காந்தி, பாண்டி, பொன்னப்பன், சித்திரைவேல், ஐயப்பன் உட்பட 10 மீனவர்கள் 2 விசைப்படகுகளில் கடந்த 7ஆம் தேதி கடலுக்கு மீன் பிடிக்கச் சென்றனர். இவர்கள் நேற்று முன்தினம் வரை கரை திரும்பவில்லை.
இது பற்றி மாவட்ட மீன்வளத்துறை உதவி இயக்குனர் உமாகாந்தனிடம் மீனவர்கள் புகார் செய்தனர். அவர் விசாரணை நடத்தியதில் 10 மீனவர்களையும் கடந்த 9ஆம் தேதி சிறிலங்க கடற்படையினர் கைது செய்தது தெரியவந்தது.
அரசு எடுத்த நடவடிக்கையின் காரணமாக, 10 மீனவர்களும் இன்று இந்திய கடலோர காவல் படையினரிடம் ஒப்படைக்கப்பட உள்ளனர் என்று நாகப்பட்டினம் மாவட்ட ஆட்சியர் ஜெயராமன் தெரிவித்தார்.
