சாயப்பட்டறை ஆலையில் இருந்து வெளியேற்றப்படும் கழிவு நீரை ஆற்றில் கலந்து விடும் உரிமையாளர்கள் மீது நடவடிக்கை எடுக்காத தமிழக அரசை கண்டித்து பா.ம.க. சார்பில் திருப்பூரில் இன்று நடந்த முழு அடைப்பு போராட்டத்தில் பேருந்து ஒன்றுக்கு தீ வைக்கப்பட்டது. இதனால் அங்கு பதற்றமான சூழ்நிலை ஏற்பட்டுள்ளது.
திருப்பூரில் உள்ள ஏராளமான சாய பட்டறை ஆலைகளில் வெளியேற்றப்படும் கழிவு நீர் நொய்யல் ஆற்றில் கலந்து ஈரோடு மாவட்டம் ஒரத்துப்பாளையம் அணையில் சேர்ந்து வருகிறது.
இந்த கழிவுநீரை ஆற்றில் விடும் சாயப்பட்டறை உரிமையாளர்கள் மீது நடவடிக்கை எடுக்காமல் இருக்கும் மாசுகட்டுப்பாடு அதிகாரிகள் மீது நடவடிக்கை எடுக்காத தமிழக அரசை கண்டித்து இன்று திருப்பூர் நகர பா.ம.க. சார்பில் முழு அடைப்பு போராட்டத்துக்கு அழைப்பு விடுத்திருந்தது.
இந்த முழு அடைப்பு போராட்டத்துக்கு விடுதலை சிறுத்தைகள், தமிழக விவசாயிகள் சங்கம், பெரியார் திராவிடர் கழகம் உள்ளிட்ட கட்சிகள் ஆதரவு அளித்திருந்தன. ஆனால் வணிகர்கள் உள்பட பெரும்பாலானவர்கள் ஆதரவு தெரிவிக்கவில்லை.
இன்று அதிகாலை வழக்கம் பேருந்துகள் ஓடிக் கொண்டிருந்தது. திருப்பூர் பழைய பேருந்து நிலையத்தில் ஏராளமான பேருந்துகள் நிறுத்தப்பட்டிருந்தது. அப்போது பேருந்து நிலையத்திற்கு வந்த மர்ம நபர்கள் சிலர் ஒரு பேருந்து மீது பெட்ரோல் ஊற்றி தீ வைத்து கொளுத்தி விட்டு அங்கிருந்து ஓடிவிட்டனர்.
தகவல் அறிந்து தீயணைப்பு வீரர்கள் விரைந்து வந்தனர். அவர்கள் வருவதற்குள் பேருந்து முழுவதும் எரிந்து நாசமானது. இதைத் தொடர்ந்து அங்கு காவல்துறையினர் குவிக்கப்பட்டுள்ளனர்.
பேருந்து எரிக்கப்பட்டதை தொடர்ந்து திருப்பூரில் பதற்றம் ஏற்பட்டுள்ளது. இதனால் மாவட்டம் முழுவதும் பலத்த பாதுகாப்பு போடப்பட்டுள்ளது.
