சென்னைக்கு வந்த சரக்கு பெட்டகம் ஒன்றில் ஒரு கோடியே 30 லட்ச ரூபாய் மதிப்புள்ள வைர கற்கள் பறிமுதல் செய்யப்பட்டுள்ளன.
சிங்கப்பூரிலிருந்து டைகர் என்ற கப்பல் சரக்குகளை ஏற்றிக் கொண்டு கடந்த வெள்ளிக்கிழமை வந்தது. இதில் ஒரு சரக்கு பெட்டகத்தில் குறைவான பொருட்களே இருந்தது. மேலும் அந்த சரக்கு பெட்டகத்தை உரிமைக்கோரி யாரும் வரவில்லை.
இதனால் சுங்கத்துறை அதிகாரிகளுக்கு சந்தேகம் ஏற்பட்டது. எனவே, அந்த சரக்கு பெட்டகத்தை திறந்து பார்த்தனர். அதில் பாதி அளவுக்கே சரக்குகள் இருந்தன. ராமநாதபுரம் மாவட்டம் இளையான்குடியை சேர்ந்த காதர் நைனா என்பவர் மலேசியாவிலிருந்து வீட்டு உபயோகப்பொருட்களை அனுப்பி இருந்தார். அதில் பாதி அளவுக்கு தான் வீட்டு உபயோகப்பொருட்கள் இருந்தன. ஷாம்பு, சோப்பு மற்றும் பிஸ்கெட்டுகள் இருந்தன.
அதற்கு அடியில் ஒரு கருப்பு பார்சல் இருந்தது. அதை திறந்து பார்த்தபோது, பல்வேறு விதமான வைரங்கள் இருந்தன. சுமார் 2 லட்சம் வைர கற்கள் அதில் இருந்தன. இவற்றின் மதிப்பு ஒரு கோடியே 34 கோடியாகும்.
இவற்றை சுங்க இலாக்கா அதிகாரிகள் கைப்பற்றி இவை யாருக்கு அனுப்பப்பட்டன என்பது குறித்து விசாரணை நடைபெற்று வருவதாக சுங்கத்துறை ஆணையர் ராஜன் இன்று செய்தியாளர்களிடம் தெரிவித்தார்.
