ராஜீவ்காந்தியின் நினைவுநாளையொட்டி வரும் 21ஆம் தேதி தமிழக காங்கிரஸ் தலைவர் கிருஷ்ணசாமி பல்வேறு நிகழ்ச்சிகளில் கலந்து கொள்கிறார்.
இது தொடர்பாக தமிழக காங்கிரஸ் கட்சி வெளியிட்டுள்ள அறிக்கையில், ராஜீவ்காந்தியின் 17ஆம் ஆண்டு நினைவுநாளையொட்டி தமிழ்நாடு காங்கிரஸ் தலைவர் கிருஷ்ணசாமி 21ஆம் தேதி காலை 8 மணிக்கு சத்தியமூர்த்தி பவனில் ராஜீவ்காந்தியின் திருஉருவப்படத்திற்கு மலரஞ்சலி செலுத்துகிறார்.
சைதாப்பேட்டை, சின்னமலையில் உள்ள ராஜீவ்காந்தி சிலைக்கு காலை 8.30 மணிக்கு மாலை அணிவிக்கிறார். 9.30 மணிக்கு ஸ்ரீபெரும்புதூரில் உள்ள ராஜீவ்காந்தி நினைவிடத்தில் மலரஞ்சலி செலுத்துகிறார்.
காலை 10 மணிக்கு ராஜீவ்காந்தி நினைவிடத்தில் கிருஷ்ணசாமி தலைமையில் நடைபெறவுள்ள ரத்ததான முகாமை அகில இந்திய காங்கிரஸ் கட்சி செயலாளர் கே.பி.கிருஷ்ணமூர்த்தி தொடங்கி வைக்கிறார்.
10.15 மணிக்கு கர்நாடகாவில் இருந்து அம்மாநில ஐ.என்.டி.யு.சி. துணைத் தலைவர் எஸ்.எஸ்.பிரகாசம் கொண்டு வரும் தலைவர் ராஜீவ்காந்தி நினைவு ஜோதியை பெற்றுக் கொள்கிறார் கிருஷ்ணசாமி.
இந்த அனைத்து நிகழ்ச்சியிலும் நாடாளுமன்ற, சட்டமன்ற உறுப்பினர்கள் கலந்து கொள்கிறார் என்று கூறப்பட்டுள்ளது.
