சிதம்பரம் அருகே மரத்தில் கார் மோதிய விபத்தில் 2 பெண்கள் உள்பட 3 பேர் நிகழ்விடத்திலேயே பலியானார்கள். 2 பேர் பலத்த காயம் அடைந்தனர்.
புதுச்சேரியை சேர்ந்த பன்னீர் செல்வம் (50), சரோஜா (50), மேரி (75), மாலினி (40), நளினி (22) ஆகியோர் வேளாங்கன்னிக்கு இன்று காரில் சென்று கொண்டிருந்தனர்.
கடலூர் மாவட்டம், சிதம்பரம் அடுத்த புதுச்சத்திரம் அருகே கார் வந்து கொண்டிருந்த போது கட்டுப்பாட்டை இழந்து சாலையோரத்தில் இருந்த மரத்தில் பயங்கரமாக மோதியது.
இதில் பன்னீர் செல்வம், சரோஜா, மேரி ஆகியோர் நிகழ்விடத்திலேயே பலியானார்கள். மாலினி, நளினி பலத்த காயம் அடைந்தனர். தகவல் அறிந்து காவல்துறையினர் விரைந்து வந்து மூன்று உடல்களை கைப்பற்றி பிரேத பரிசோதனைக்காக கடலூர் அரசு மருத்துவமனைக்கு அனுப்பி வைத்தனர்.
படுகாயம் அடைந்த இருவரையும் புதுச்சேரி அரசு மருத்துவமனைக்கு கொண்டு சென்றனர்.
இந்த விபத்து குறித்து காவல்துறையினர் வழக்குப் பதிவு செய்து விசாரித்து வருகின்றனர்.
