''தமிழகத்தில் இந்த ஆண்டுக்குள் ஐந்து பொறியியல் கல்லூரிகள் தொடங்கப்படும்'' என்று உயர் கல்வித் துறை அமைச்சர் பொன்முடி கூறியுள்ளார்.
சட்டப்பேரவையில் இன்று அமைச்சர் பொன்முடி தாக்கல் செய்த உயர் கல்வித் துறை மானியக் கோரிக்கையின் கொள்கை விளக்க குறிப்பில், 2008-09ஆம் ஆண்டில் விழுப்புரம், பண்ருட்டி, திண்டிவனம், நாகப்பட்டினம், ராமநாதபுரம் ஆகிய இடங்களில் புதிய பொறியியல் கல்லூரிகள் தொடங்கப்பட உள்ளன. இந்த கல்லூரிகளை அண்ணா பல்கலைக்கழகங்கள் தொடங்கும்.
மாறுபட்ட பாடத்திட்டங்களாலும், தேர்வு முடிவுகளில் மதிப்பீட்டு மாறுபாடுகளாலும், மதிப்பெண்கள் சான்றிதழ் வழங்குவதில் ஏற்படும் காலத்தாமதத்தாலும், மாணவர்கள் படும் சிரமத்தை களைய உயர் கல்வித்துறையின் கீழ் வரும் அனைத்து கல்வி நிறுவனங்களிலும், பல்கலைக்கழகங்களிலும் குறித்த நேரத்தில் தேர்வுகளை நடத்தவும், தேர்வு முடிவுகளை அறிவிக்கவும், வகை செய்யும் விதத்தில் தேர்வு அட்டவணையை கொண்டு வருவதற்கு அரசு தகுந்த நடவடிக்கைகளை மேற்கொள்ளும்.
கலை மற்றும் அறிவியல் பாடங்களை பயிலும் மாணவர்களில் 70 விழுக்காட்டிற்கும், மேற்பட்டோர் படிப்பு முடித்து 3 ஆண்டுகளுக்கும் மேலாக வேலை வாய்ப்பு பெற முடியாத நிலையில் உள்ளனர். இந்த மாணவர்கள் வேலை வாய்ப்பு பெற உதவும் வகையில் கூடுதலாக தொழில் சார் படிப்பை அரசு உருவாக்கி இருக்கிறது. இந்த கல்வி ஆண்டு முதல் இத்திட்டம் அறிமுகப்படுத்தப்படும்.
விருப்பார்ந்த தகுநிறை கல்வித்திட்டம்!
2008-09 ஆம் கல்வியாண்டு முதல் அனைத்து கல்லூரிகள் மற்றும் பல்கலைக்கழகங்களில் விருப்பார்ந்த தகுநிறை கல்வித்திட்டம் கட்டாயமாக்கப்படும். சென்னை, கோயம்புத்தூர், திருச்சி, மதுரை ஆகிய நகரங்களில் சோதனை அடிப்படையில் கல்லூரிகள் தொகுப்பு திட்டம் நடைமுறைப்படுத்தப்படும்.
பொறியியல் கல்லூரிகளில் இட ஒதுக்கீடு அதிகரிப்பு!
பொறியியல் கல்லூரிகளில் மாணவர் சேர்க்கையில் முன்னாள் ராணுவத்தினரின் பிள்ளைகளுக்கான இட ஒதுக்கீட்டினை 81ல் இருந்து 150 (அண்ணா பல்கலையில் 8, அரசு மற்றும் அரசு உதவி பெறும் கல்லூரிகளில் 34, சுயநிதி பொறியியல் கல்லூரிகளில் 108) இடங்களாகவும், விளையாட்டு வீரர்களுக்கான இடங்களை 42ல் இருந்து 100 (அண்ணா பல்கலையில் 12, அரசு மற்றும் அரசு உதவி பெறும் கல்லூரிகள் மற்றும் சுயநிதி பொறியியல் கல்லூரிகளில் 88) இடங்களாகவும் உயர்த்தப்படும் என்று தெரிவிக்கப்பட்டுள்ளது.
