''சென்னை உயர் நீதிமன்றத்தில் விரைவில் தமிழ் வழக்கு மொழியாக வரும்'' என்று சட்ட அமைச்சர் துரைமுருகன் கூறினார்.
சென்னையில் சட்டக் கல்வி இயக்கக புதிய கட்டடம், டாக்டர் அம்பேத்கர் அரசு சட்டக் கல்லூரி புதிய நூலகக் கட்டடம் ஆகியவற்றை திறந்துவைத்து அமைச்சர் துரைமுருகன் பேசுகையில், நீதித்துறைக்கு தேவையான அனைத்து உதவிகளையும் அரசு செய்யும். நீதிபதிகளுக்கான குடியிருப்புகள், நீதிமன்றங்களுக்கான கட்டடங்கள் போன்ற பணிகள் விரைவாக நடைபெற்று வருகின்றன.
தேங்கியுள்ள வழக்குகளை விரைந்து முடிக்கும் வகையில் புதிய நீதிமன்றங்களும், விரைவு நீதிமன்றங்களும் ஏற்படுத்தப்பட்டுள்ளன. உயர் நீதிமன்றத்தில் விரைவில் தமிழ் வழக்கு மொழியாக வரும்.
சென்னை அம்பேத்கர் சட்டக் கல்லூரிக்கான புத்தகங்கள் மிகவும் குறைவாக உள்ளன. மாநில சட்டக் கமிஷன் நூலகத்தில் உள்ள புத்தகங்கள் சட்டக் கல்லூரி நூலகத்துக்கு வழங்க நடவடிக்கை மேற்கொள்ளப்படும் என்று அமைச்சர் துரைமுருகன் கூறினார்.
