''குடும்ப அட்டை வைத்திருக்கும் அனைவருக்கும் இலவச வண்ணத் தொலைக்காட்சி வழங்கப்படும்'' என்று சட்டப் பேரவையில் இன்று உள்ளாட்சித் துறை அமைச்சர் மு.க.ஸ்டாலின் கூறினார்.
சட்டப் பேரவையில் இன்று நடந்த பட்ஜெட் மீதான பொது விவாதத்தின் போது அ.இ.அ.தி.மு.க. உறுப்பினர்கள், இலவச வண்ணத் தொலைக்காட்சி பெட்டி குடும்ப அட்டை வைத்திருக்கும் அனைவருக்கும் வழங்கப்படுமா? என்று கேட்டனர்
இதற்கு பதில் அளித்து உள்ளாட்சித்துறை அமைச்சர் மு.க.ஸ்டாலின் பேசுகையில், யார் யார் வீட்டில் இலவச வண்ணத் தொலைக்காட்சி பெட்டி இல்லையோ அவர்கள் குடும்ப அட்டை வைத்திருந்தால் இலவச வண்ணத் தொலைக்காட்சி பெட்டி வழங்கப்படும். வண்ணத் தொலைக்காட்சி பெட்டி குழுவில் கூட அ.இ.அ.தி.மு.க. இடம் பெற முதலமைச்சர் கடிதம் எழுதி இருந்தார். ஆனால் அவர்கள் தான் இடம் பெறவில்லை.
தேர்தல் அறிக்கையிலும், பல்வேறு கூட்டங்களிலும் நாங்கள் தெளிவாக சொல்லி இருக்கிறோம். எல்லோருக்கும் வண்ணத் தொலைக்காட்சி பெட்டி கிடைக்க வேண்டும் என்றாலும் முதலில் யார்- யாருக்கு தொலைக்காட்சி பெட்டி இல்லையோ அவர்களுக்கு இலவச வண்ணத் தொலைக்காட்சி பெட்டி கொடுக்க முதலமைச்சர் ஏற்கனவே கூறியிருந்தார்.
பின்னர் எல்லோருக்கும் கொடுப்பது பற்றி பரிசீலிக்கப்படும் என்று பேசினார். கட்சி பாகுபாடு பார்க்காமல் தான் இலவச வண்ணத் தொலைக்காட்சி பெட்டி வழங்கப்படுகிறது என்று அமைச்சர் மு.க.ஸ்டாலின் கூறினார்.
