முட்டம் கடற்கரையிலிருந்து சென்று ஆழ்கடலில் மீன்பிடித்துக் கொண்டிருந்த கன்னியாகுமரி மாவட்ட மீனவர்கள் 25 பேரை இலங்கை கடற்படை கைது செய்துள்ளது.
கன்னியாகுமரி மாவட்டம், நித்திரவிளை காவல் நிலைய சரகத்திற்கு உட்பட்ட தூத்தூர் கடற்கரைப் பகுதியைச் சேர்ந்த இரண்டு விசைப்படகுகளில் மீனவர்கள் மீன் பிடிக்கச் சென்றுள்ளனர். ஒரு விசைப் படகில் 12 மீனவர்களும், மற்றொரு விசைப்படகில் 13 மீனவர்களும் சென்றுள்ளனர்.
இம் மீனவர்கள் 25 பேரும் கன்னியாகுமரி அருகேயுள்ள முட்டம் மீன்பிடித் துறைமுகத்தில் இருந்து கடந்த வெள்ளிக்கிழமை ஆழ்கடலில் மீன்பிடிக்கச் சென்றனர்.
இவர்கள் தென்கிழக்கு திசைப் பகுதியில் புதன்கிழமை (பிப்ரவரி 27ஆம் தேதி) மீன்பிடித்துக் கொண்டிருந்தனர்.
அப்போது அங்கு வந்த இலங்கைக் கடற்படையினர், இவர்களது இரண்டு படகுகளையும், அதிலிருந்த 25 மீனவர்களையும் பிடித்துச் சென்று இலங்கை நீர்கொழும்பு பகுதியில் வைத்துள்ளதாக தகவல்கள் வந்துள்ளன.
இலங்கை கடற்படையினரால் பிடித்துச் செல்லப்பட்ட மீனவர்களை மீட்க கோரி, தூத்தூர் ஆழ்கடல் மீன்பிடித் தொழிலாளர் சங்கத்தினர் சம்பந்தப்பட்ட துறை அதிகாரிகளுக்கு தகவல் கொடுத்துள்ளனர்.
