உலக புகழ் பெற்ற ஜல்லிக்கட்டு போட்டியை நடத்த உச்ச நீதிமன்றம் நிபந்தையுடன் அனுமதி வழங்கியதைத் தொடர்ந்து பாலமேட்டில் இன்று ஜல்லிக்கட்டு போட்டி கோலா கலத்துடன் துவங்கியது. அனைவரும் எதிர்பார்த்த அலங்காநல்லூர் ஜல்லிக்கட்டு போட்டி நாளை துவங்குகிறது.
மிருகங்கள் வதைக்கப்படுவதாக கூறி உலக புகழ் பெற்ற அலங்காநல்லூர் ஜல்லிக்கட்டு போட்டிக்கு உச்ச நீதிமன்றம் கடந்த 11ஆம் தேதி தடை விதித்தது. இதைத் தொடர்ந்து பாரம்பரியம் மிக்க ஜல்லிக்கட்டு போட்டிக்கு விதிக்கப்பட்ட தடையை மனு ஆய்வு செய்ய உச்ச நீதிமன்றத்தில் தமிழக அரசு மனு தாக்கல் செய்திருந்தது. இந்த மனுவை நேற்று விசாரித்த உச்ச நீதிமன்ற தலைமை நீதிபதி கே.ஜி.பாலகிருஷ்ணன் தலைமையிலான முதன்மை அமர்வு கடும் நிபந்தனையுடன் ஜல்லிக்கட்டு போட்டி நடத்த அனுமதி அளித்தது.
உச்ச நீதிமன்றம் ஜல்லிக்கட்டு போட்டி நடத்த அனுமதி வழங்கியதும் அலங்காநல்லூர், பாலமேடு மற்றும் சுற்று கிராம மக்கள் உற்சாகம் அடைந்தனர். பட்டாசு வெடித்து மக்கள் தங்கள் சந்தோசத்தை வெளிப்படுத்தினர். பேருந்துகளில் பயணம் செய்தவர்களுக்கு இனிப்பு கொடுத்தனர்.
இதைத் தொடர்ந்து அலங்காநல்லூருக்கு மாடுபிடி வீரர்களும், காளைகளின் சொந்தகாரர்களும் குவியத் துவங்கினர். லாரி, டிராக்டர்களில் ஜல்லிக்கட்டு காளைகள் கொண்டு வரப்பட்டன. ஜல்லிக்கட்டு போட்டியை நடத்துவதற்கான ஏற்பாடுகள் தீவிரமடைந்துள்ளது. பார்வையாளர்கள் அமர்வதற்கு காலரிகள், தடுப்பு கட்டைகள் அமைக்கும் பணியும் முடிந்துள்ளது.
பாலமேட்டில் இன்று ஜல்லிக்கட்டு துவங்கியது. அங்குள்ள கோவில்களில் சிறப்பு பூஜைகள் செய்யப்பட்டு கோவில் காளை முதலில் விடப்பட்டது. அதன் பிறகு மற்ற காளைகள் விடப்பட்டன. 200-க்கும் மேற்பட்ட காளைகளும், அவற்றை அடக்குவதற்காக ஆயிரத்திற்கும் மேற்பட்ட மாடுபிடி வீரர்களும் குவிந்தனர். ஜல்லிக்கட்டு காளைகள் சீறிபாய்ந்து வந்தன. அந்த காளைகளை வீரர்கள் போட்டி போட்டு அடக்கினர். மாலை 5 மணி வரை ஜல்லிக்கட்டு நடைபெறுகிறது.
திருச்சி மாவட்டம், திருவெறும்பூரையொட்டியுள்ள கூத்தப்பார் கிராம மக்கள் இன்று காலை தங்கள் மாடுகளை வீதிகளில் அவிழ்த்து விட்டனர். உடனே இளைஞர்கள் பலர் அந்த மாடுகளை விரட்டி பிடித்தனர். தென் மாவட்டங்களின் மற்ற இடங்களிலும் ஜல்லிக்கட்டு போட்டி நடக்கிறது.
