கோவை குண்டு வெடிப்பு வழக்கில் சிறு குற்றங்கள் நிரூபிக்கப்பட்டவர்களில் மீதமுள்ள 3 பேருக்குத் தலா 7 ஆண்டுகள் சிறை தண்டனை விதித்துத் தனி நீதிமன்றம் உத்தரவிட்டுள்ளது.
கோவையில் கடந்த 1998-ஆம் ஆண்டு பிப்ரவரி மாதம் 14-ஆம் தேதி நடைபெற்ற குண்டு வெடிப்பு வழக்கில் 168 பேரைச் சி.பி.சி.ஐ.டி. காவல் துறையினர் கைது செய்தனர். இதில் 158 பேர் குற்றவாளிகள் என கடந்த ஆகஸ்ட் 1 ஆம் தேதி தனி நீதிமன்றம் தீர்ப்பளித்தது.
இவர்களில் 88 பேருக்கு எதிராக சிறு குற்றச்சாற்றுகள் நிரூபிக்கப்பட்டுள்ளன. 70 பேருக்கு எதிராக சதித்திட்டம் தீட்டுதல் என்பது உள்ளிட்ட பெரிய குற்றங்கள் நிரூபிக்கப்பட்டுள்ளன.
இதில் கேரள மக்கள் ஜனநாயகக் கட்சித் தலைவர் அப்துல் நாசர் மதானி உட்பட 8 பேர் விடுதலை செய்யப்பட்டனர். மேலும் 85 பேருக்கு அவர்களுடைய குற்றத்திற்குத் தகுந்தவாறு 9 ஆண்டுகள் வரை சிறைத் தண்டனை விதிக்கப்பட்டது.
இந்நிலையில் இன்று மீதமுள்ள அபுதாகீர், கிச்சன் புகாரி, சித்திக் அலி ஆகிய 3 பேருக்கும் தலா 7 ஆண்டுகள் சிறை தண்டனை விதித்து நீதிபதி உத்திராபதி உத்தரவிட்டார்.
சதித்திட்டம் தீட்டுதல் போன்ற பெரிய குற்றச்சாற்றுகள் நிரூபிக்கப்பட்ட அல் உமா இயக்கத்தலைவர் பாஷா, செயலாளர் அன்சாரி உள்ளிட்ட 70 பேருக்கான தண்டனை விவரம் 24-ஆம் தேதி அறிவிக்கப்படும்.
