சேது சமுத்திர திட்டத்தை நிறைவேற்ற வலியுறுத்தி அக்டோபர் 1ந் தேதி தமிழகத்தில் முழு வேலை நிறுத்தம் நடைபெறும் என்று தி.மு.க.வின் தோழமைக் கட்சி தலைவர்கள் பங்கேற்ற கூட்டத்தில் முடிவு செய்யப்பட்டது.
சேது சமுத்திர திட்டத்திற்காக தோண்டப்படும் கால்வாயால் ராமர் பாலம் என்று அழைக்கப்படும் ஆதம் பாலம் அழிந்து விடும். இது ராமர் கட்டிய பாலம் எனவே இதனை தோண்டக் கூடாது என உச்ச நீதி மன்றத்தில் வழக்கு தொடரப்பட்டுள்ளது. உச்ச நீதிமன்றம், ஆதம் பாலம் பகுதியில் கால்வாய் தோண்டுவதற்கு இடைக்கால தடை விதித்துள்ளது.
இந்நிலையில், தமிழக முதலமைச்சரும், தி.மு.க. தலைவருமான கருணாநிதி ராமரை அவமதிக்கும் வகையில் பேசி விட்டார் என்று பாரதீய ஜனதா எதிர்ப்பு தெரிவித்து வருகிறது. பாரதீய ஜனதா கட்சியின் முன்னாள் மக்களவை உறுப்பினரும், விஷ்வ ஹிந்து பரிஷத் அமைப்பை சேர்ந்தவருமான வேதாந்தி என்பவர் கருணாநிதியின் தலை, நாக்கை துண்டிப்பவர்களுக்கு பரிசு அளிக்கப்படும் என்று அறிவித்து, இது மத கட்டளை என்று கூறப்படும் பாத்வாவை அறிவித்தார்.
இதற்கு நாடு முழுவதும் கண்டனம் தெரிவிக்கப்பட்டது. பாரதிய ஜனதாவும், விஷ்வ ஹிந்து அமைப்பும் வேதாந்திக்கும், எங்கள் அமைப்புக்கும் எவ்வித தொடர்பும் இல்லை என அறிவித்தன.
இந்நிலையில் சேது சமுத்திர திட்டத்தை நிறைவேற்ற எடுக்கப்பட வேண்டிய நடவடிக்கைகள் குறித்து ஆலோசிக்க, சென்னையில் நேற்று தி.மு.க கூட்டணி கட்சி தலைவர்கள் பங்கேற்ற கூட்டம் நடைபெற்றது. இந்த கூட்டம் தி.மு.கவின் தலைமையகமான அண்ணா அறிவாலயத்தில் முதலமைச்சர் கருணாநிதி தலைமையில் பெற்றது.
இதில் சேது சமுத்திர திட்ட பணிகள் குறித்து கட்சித் தலைவர்களுக்கு விளக்கப்படம் காண்பிக்கப்பட்டது. சேது சமுத்திர திட்டப்பணிகளை மத்திய கப்பல் போக்குவரத்து துறை அமைச்சர் டி.ஆர்.பாலு விளக்கினார்.
இதற்கு பிறகு கட்சித் தலைவர்கள், தங்களது ஆலோசனைகளை வழங்கினார்கள். இதில் இரண்டு தீர்மானங்கள் நிறைவேற்றப்பட்டன. முதல்வர் கருணாநிதி தீர்மானங்களின் விபரங்களை விளக்கினார். தி. மு. க வின் பொதுச் செயலாளர் அன்பழகன் தீர்மானத்தை படித்தார்.
இதில் நிறைவேற்றப்பட்ட தீர்மானங்கள் வருமாறு.
தென்னக மக்களின் நூற்றாண்டு கனவான சேது சமுத்திரத் திட்டம் 2005 ஆம் ஆண்டில் பிரதமரால் தொடங்கப்பட்டு, தற்போது பணிகள் நடைபெற்று வருகின்றன. இதற்கு எதிராகச் செயல்பட்டு வரும் மதவெறிக் கூட்டத்தைச் சார்ந்த ஓருவர், தி.மு.க தலைவர் கருணாநிதியின் தலையையும், நாக்கையும் அறுத்து வருபவருக்கு, அதற்கு ஈடாக தங்கம் பரிசளிக்கப்படும் என்று பேசியுள்ளார்.
இதன் மூலம் தமிழகத்தில் மதவெறி தூண்டப்பட்டு, கருணாநிதியின் உயிருக்கு ஆபத்து ஏற்படலாம் என்பதை அறிந்து நாட்டு மக்கள் மிகவும் பதற்றமடைந்துள்ளனர்.
அத்தகைய அக்கிரமமான மதவெறியைத் தூண்டும் வகையில் பேசியவர் மீது கிரிமினல் சட்ட அடிப்படையில் வழக்கு பதிவு செய்து, அவரை கைது செய்ய வேண்டும் என மத்திய அரசை வலியுறுத்துவது என கூட்டத்தில் தீர்மானிக்கப்பட்டது.
மதவாத சக்திகளான இந்த வன்முறைக் கூட்டம், நமது நீண்ட நாள் கனவான, சேது சமுத்திரத் திட்டம் நிறைவேற்றப்பட்டு விடக்கூடாது என்ற சூழ்ச்சியான எண்ணத்துடன் எல்லா கட்டங்களிலும் எதிர்ப்பு முயற்சியில் ஈடுபட்டு வருகிறது.
தமிழக மக்களின் பொருளாதார ஏற்றத்திற்கு பெரிதும் பயன்படக் கூடிய, இத்திட்டத்திற்கு தடையாக, அந்த சக்திகள் இருப்பதை பொருட்படுத்தாமல், சேது சமுத்திர திட்டத்தை விரைவில் நிறைவேற்றப்பட வேண்டும் என்பதை மத்திய அரசுக்கு உணர்த்தும் வகையில் அக்டோபர் 1 ம் தேதி ஒரு நாள் முழு வேலை நிறுத்தம் மற்றும் கடையடைப்பு நடத்தப்படும்.
அதற்கு முன்தினம் சென்னையில் அனைத்துக் கட்சித் தலைவர்களின் பொதுக்கூட்டம் நடத்துவதெனவும் கூட்டத்தில் தீர்மானிக்கப்பட்டன.
இந்த கூட்டத்தில் அமைச்சர்கள் அன்பழகன், துரைமுருகன், மத்திய அமைச்ச்ர் டி. ஆர்.பாலு (தி.மு.க), ஈ.வி.கே.எஸ் இளங்கோவன், எம் கிருஷ்ணசாமி, டி.சுதர்சனம் ( காங்), டாக்டர் ராமதாஸ், ஜி.கே. மணி (பா..ம.க), என். வரதராஜன், டி.கே.ரங்கராஜன் ( சி.பி.எம்) தா.பாண்டியன், சி.மகேந்திரன் (சி.பி.ஐ), திருமாவளவன், ரவிக்குமார், பாவரசு (விடுதலை சிறுத்தைகள்), வீரமணி, கலி.பூங்குன்றன், க.திருநாவுக்கரசு (தி.க), எல்.கணேசன், செஞ்சி. ராமச்சந்திரன் (ம.தி.மு.க) , ஹக்கீம் சையத் சத்தார் ( இ.யூ..மு.லீக்), பூ.வை. ஜெகன் மூர்த்தி (புரட்சி பாரதம் ), ஆகியோர் கலந்து கொண்டனர்.
