ஒலிம்பிக் தகுதி இறுதிப் போட்டியில் இந்திய அணிக்கு எதிராக நடுவர்கள் அளித்த ஒருதலைப்பட்சமான முடிவுகளும் தோல்விக்கு ஒரு காரணமாகும் என்று பயிற்சியாளர் ஜோக்கிம் கர்வாலோ கூறியுள்ளார்.
சிலி நாட்டின் தலைநகர் சாண்டியாகோவில் நடைபெற்ற ஒலிம்பிக் தகுதிப் போட்டிகளின் இறுதியில் தோற்றதால் ஒலிம்பிக் போட்டிகளுக்குத் தகுதி பெறும் வாய்ப்பை இழந்த இந்திய ஹாக்கி அணி இன்று அதிகாலை மும்பை வந்து சேர்ந்தது.
நீண்ட நேர விமான பயணத்தினால் இந்திய வீரர்கள் களைப்புற்று இருந்தனர். விமான நிலையத்தில் திரண்டிருந்த செய்தியாளர்களிடம் பேசிய பயிற்சியாளர் கர்வாலோ, இங்கிலாந்து அணியுடன் ஒப்பிடுகையில் திறமை வாய்ந்த வீரர்களைக் கொண்டிருந்த இந்திய அணி, உரிய நேரத்தில் அதனை வெளிப்படுத்தத் தவறிவிட்டதே தோல்விக்கு முக்கியக் காரணம் என்று கூறினார்.
இந்தப் போட்டி முழுவதும் நடுவர்களின் ஒருதலைப்பட்ச நடத்தைகளால் இந்திய அணி பல பின்னடைவுகளைச் சந்தித்தது என்று கூறிய கர்வாலோ, இறுதிப் போட்டியில் அளிக்கப்பட்ட இரண்டு தண்டனை அட்டைகளால் 25 நிமிடத்திற்கு இந்திய அணி 10 வீரர்களுடன் ஆட வேண்டிய நிலை ஏற்பட்டதாகக் கூறினார்.
“இந்திய அணி வீரர்களுக்கு எதிராக நடுவர்கள் அளித்த தண்டனை அட்டைகள் அதிகப்படியானவை. தேவையில்லாமல் மற்ற வீரர்களையும் கண்டித்தனர். இந்திய வீரர்களுக்கு எதிராக கடிதங்கள் அனுப்பி இரவு 11 மணிக்கு விசாரணைக்கு வருமாறு அழைத்து அவர்களை காக்க வைத்து அலைக்கழித்தனர்” என்று கர்வாலோ கூறினார்.
