மெல்போர்னில் ஜனவரி 14ஆம் தேதி துவங்கும் ஆஸ்ட்ரேலிய ஓபன் டென்னிஸ் போட்டிகளுக்கான தர வரிசையில் இந்தியாவின் சானியா மிர்சா 31-வது இடத்தில் உள்ளார்.
ஆஸ்ட்ரேலிய ஓபன் டென்னிஸ் போட்டிக்கான தர வரிசை சர்வதேச மகளிர் டென்னிஸ் சங்கத்தின் தர வரிசை அடிப்படையில் நிர்ணயிக்கப்படுகிறது. இதன்படி 31-வது இடத்தில் இந்தியாவின் சானியா மிர்சா இடம் பெற்றுள்ளார். இதனால் முதல் சுற்றுக்களில் அவர் பெரிய வீராங்கனைகளுடன் மோதுவது தவிர்க்கப்பட்டுள்ளது.
உலகின் முதல் நிலை வீராங்கனையான ஜஸ்டின் ஹெனின் ஆஸ்ட்ரேலிய ஓபன் தர வரிசையில் முதலிடத்தில் உள்ளார். அவருக்கு அடுத்தபடியாக ஸ்வெட்லானா குஸ்நெட்சோவா, ஜெலினா ஜாங்கோவிக் ஆகியோர் உள்ளனர்.
அமெரிக்க வீராங்கனை செரீனா வில்லியம்ஸ் 7-வது இடத்திலும், அவரது சகோதரி வீனஸ் வில்லியம்ஸ் 8வது இடத்திலும் உள்ளனர்.
ஆடவர் பிரிவில் ரோஜர் பெடரர் முதல் இடத்திலும், ரபேல் நடால் 2-வது இடத்திலும், நோவா ஜோகோவிக் 3-வது இடத்திலும் உள்ளனர்.
