18 மாத கைக்குழந்தையுடன் வந்த AI நிறுவனத்தின் CEO.. தொழில்நுட்ப விழாவில் அனுமதி மறுப்பு..!

AI சார்ந்த ஸ்டார்ட்அப் நிறுவனமான Humanvantage AI-ன் CEO டவினா ஷோன்லே, தனது 18 மாத குழந்தையுடன் லண்டன் தொழில்நுட்ப வார விழாவிற்குள் நுழைய அனுமதிக்கப்படாததால் "அவமானப்படுத்தப்பட்டதாக" உணர்ந்தார். 3 மணி நேரம் பயணம் செய்து வந்தும், குழந்தை வண்டியில் இருந்த தனது மகள் இசபெல்லாவுடன் உள்ளே செல்ல நிகழ்ச்சி அதிகாரிகள் மறுத்துள்ளனர்.

இந்த அனுபவத்தை தனது லிங்க்ட்இன்  பக்கத்தில் பகிர்ந்து கொண்ட ஷோன்லே, இது பணிபுரியும் தாய்மார்களுக்கு போதிய வசதிகள் இல்லாததை காட்டுகிறது என்று வேதனை தெரிவித்தார். 

"என் குழந்தை என்னுடன் இருந்ததால் அனுமதி மறுக்கப்பட்டது. என் குழந்தையை விட்டு நான் எவ்வளவு நேரம் வெளியே இருக்கிறேன் என்பதற்கு கட்டுப்பாடு உள்ளது. என் குழந்தையை என் பக்கத்தில் வைத்துக்கொண்டே என் நிறுவனத்தை உருவாக்க நான் அனுமதிக்கப்பட வேண்டும்" என்று அவர் தனது பதிவில் குறிப்பிட்டார்.

பெற்றோர்கள், புதுமையாளர்கள், நிறுவனர்கள், முதலீட்டாளர்கள் என அனைவரும் இந்தத் தொழில்நுட்ப சூழல் அமைப்பின் ஒரு பகுதியினர் என்றும், பெரிய நிகழ்வுகள் அவர்களுக்கு இடம் கொடுக்காவிட்டால், அது தொழில்நுட்ப துறையில் யார் இருக்க வேண்டும் என்பது குறித்து என்ன செய்தியை அனுப்புகிறது என்றும் அவர் வலியுறுத்தினார்.

Edited by Siva