மீண்டும் ரிலீசாகும் விஜய் சேதுபதியின் ‘மகாராஜா’.. இன்னொரு 100 கோடி ரூபாய் வசூலா?

சீனாவில் தமிழ் படங்கள் மிக குறைவாகவே வெளியாகி வரும் நிலையில், நடிகர் விஜய் சேதுபதியின் சூப்பர் ஹிட் திரைப்படம் சீனாவில் வெளியாக இருப்பதாக அறிவிக்கப்பட்டு, புதிய போஸ்டர் வெளியிடப்பட்டுள்ளது.  

விஜய் சேதுபதி நடிப்பில், நிதிலன் சுவாமிநாதன் இயக்கத்தில் உருவான ‘மகாராஜா’ திரைப்படம் கடந்த ஜூன் மாதம் வெளியானது. 20 கோடி ரூபாய் பட்ஜெட்டில் உருவான இந்த படம் 110 கோடி ரூபாய் வரை வசூல் செய்து, வணிக ரீதியிலும் வெற்றியை அடைந்தது என்பதும் குறிப்பிடத்தக்கது.

இந்த படம் ஓடிடி ப்ளாட்ஃபார்மிலும் பாராட்டுகளை பெற்ற நிலையில், அடுத்த கட்டமாக சீனாவில் வெளியிடப்பட உள்ளதாக அறிவிக்கப்பட்டுள்ளது. ‘மகாராஜா’ திரைப்படம் நவம்பர் 29ஆம் தேதி சீன திரையரங்குகளில் வெளியாக உள்ளதாகவும், அதற்கான அதிகாரப்பூர்வ போஸ்டரும் வெளியாகி வைரலாகி வருகின்றது. சீனாவிலும் இந்த படம் 100 கோடி ரூபாய் வசூல் செய்யுமா என்பதை பொறுத்திருந்து பார்ப்போம்.

இந்த படத்தின் ஹிந்தி ரீமேக் உரிமையை பிரபல பாலிவுட் நடிகர் அமீர்கான் பெற்றதாகவும், அவர் விஜய் சேதுபதியின் கதாபாத்திரத்தில் நடிக்க உள்ளதாகவும் செய்திகள் வெளியானது என்பது தெரிந்ததே.

Edited by Mahendran