சர்ச்சைகளைக் கிளப்பிய ‘Bad Girl’ படத்தின் ரிலீஸ் தேதி அறிவிப்பு!

இயக்குனர் வெற்றிமாறனின் கிராஸ் ரூட் புரொடக்‌ஷன்ஸ் தயாரிப்பில், அறிமுக இயக்குனர் வர்ஷா இயக்கத்தில் உருவான ‘பேட் கேர்ள்’ திரைப்படத்தின் டீசர் சமீபத்தில் வெளியானது. இந்த டீசரில் ஒரு பதின் பருவ பெண்ணின் விருப்பங்கள் மற்றும் ஆசைகள் சார்ந்த காட்சிகள் பலவற்றைக் காட்டியிருந்தனர். அதில் அந்த பெண் புகைப்பிடிப்பது, குடிப்பது  போன்ற காட்சிகள் இருந்ததால் கண்டனங்கள் எழுந்தன.

இந்த டீசரைப் பாராட்டிய விஜய் சேதுபதி, பா ரஞ்சித் ஆகியோருக்கு எதிராகவும் சமூகவலைதளங்களில் கண்டனப் பதிவுகள் வெளியாகின. இதையடுத்து இந்த படத்தை ரிலீஸ் செய்யக் கூடாது என்றும் தற்போது கருத்துகள் எழுந்தன. இதையடுத்து அந்த படத்துக்கு மிஷ்கின் உள்ளிட்ட இயக்குனர்கள் ஆதரவாகப் பேசினர். இந்நிலையில் இந்த படம் பல வெளிநாட்டு திரைப்பட விழாக்களுக்கு சென்று போட்டியிட்டது.

இந்நிலையில் இப்போது செப்டம்பர் 5 ஆம் தேதி இந்த படம் ரிலீஸாகவுள்ளதாக படக்குழு அறிவித்துள்ளது. படம் பற்றிய சர்ச்சைகள் ஓய்ந்துள்ள நிலையில் இப்போது படத்தின் ரிலீஸ் தேதி அறிவிக்கப்பட்டிருக்கிறது என்பது குறிப்பிடத்தக்கது.