தனுஷ் நடிப்பில், வெற்றிமாறன் இயக்கத்தில் உருவான 'வடசென்னை' திரைப்படம் ரசிகர்களிடம் சிறப்பான வரவேற்பைப் பெற்றது. இதன் இரண்டாம் பாகம் விரைவில் உருவாக வேண்டும் என்ற எதிர்பார்ப்பில் ரசிகர்கள் எதிர்நோக்கி காத்திருந்தனர்.
இருப்பினும், தனுஷும் வெற்றிமாறனும் தலா வெவ்வேறு படங்களில் பணியாற்றி வருவதால், 'வடசென்னை 2' திரைப்படத்தில் தனுஷ் நடிக்கவில்லை என்றும், அதேபோல் வெற்றிமாறன் இயக்கப் போவதில்லை என்றும் தகவல்கள் வெளியானது.
ஆனால், அதெல்லாம் முழுக்க முழுக்க வதந்தி என்றும் 'வடசென்னை 2' படத்தை வெற்றிமாறனே இயக்கப் போவதாகவும், தனுஷே இதன் கதாநாயகனாக நடிக்கிறார் என்றும் புதிய தகவல்கள் வெளியாகியுள்ளன. மேலும், வேல்ஸ் பிலிம்ஸ் இன்டர்நேஷனல் நிறுவனத்தின் சார்பில் ஐசரி கணேஷ் தயாரிக்க உள்ளதாகவும் தகவல் கிடைத்துள்ளது.
சமீபத்தில், வெற்றிமாறன், தனுஷ், ஐசரி கணேஷ் ஆகியோர் சந்தித்து, இப்படத்தை பற்றிய முக்கிய கலந்துரையாடல் நடத்தியிருப்பதாக தகவல் வெளிவந்துள்ளது. அடுத்த ஆண்டில் படப்பிடிப்பு தொடங்கவுள்ளதாகவும் விரைவில் அறிவிப்பு வரும் என்று கூறப்படுவது தனுஷ் ரசிகர்களை மகிழ்ச்சியடையச் செய்துள்ளது.
