சூர்யாவின் அடுத்த படம் வாடிவாசல் இல்லையா?... சூர்யா எடுத்த அதிரடி முடிவு!

விடுதலை படத்தை வெற்றிமாறன் தொடங்கும் முன்பே ‘வாடிவாசல்’ படத்தை சூர்யா மற்றும் தயாரிப்பாளர் தாணுவோடு இணைந்து அறிவித்தார். ஆனால் சிறிய பட்ஜெட்டில் தொடங்கிய விடுதலை நான்கு ஆண்டுகளுக்கு மேல் இழுத்துக் கொண்டதால் இன்னும் ‘வாடிவாசல்’ தொடங்கப்படவில்லை.

தற்போது விடுதலை 2 திரைப்படம் ரிலீஸாகிவிட்டதால் வெற்றிமாறன் ‘வாடிவாசல்’ படத்தில் கவனம் செலுத்தி வருகிறார். இந்நிலையில் ‘வாடிவாசல்’ திரைப்படத்தை மூன்று பாகங்களாக உருவாக்கப்பட உள்ளதாகவும் இந்த ஆண்டு மத்தியில் ஷூட்டிங் தொடங்கவுள்ளதாகவும் சொல்லப்படுகிறது.

இதற்கிடையில் தற்போது சூர்யா குறுகிய காலப் படங்களாக நடித்துக் கொண்டு வருகிறார். அந்த வகையில் தற்போது ஆர் ஜே பாலாஜி இயக்கும் படத்தில் நடித்து வருகிறார். அடுத்து அவர் வாடிவாசல் படத்தில் நடிப்பார் என்று எதிர்பார்க்கப்பட்ட நிலையில் அதற்கு முன்பாக வெங்கி அட்லூரி இயக்கத்தில் உருவாகும் படத்தில் நடிக்க உள்ளதாக சொல்லப்படுகிறது. அதன் பின்னர்தான் அவர் வாடிவாசல் படத்துக்குத் தேதிகள் ஒதுக்குவார் என்று சொல்லப்படுகிறது.