கடந்த ஆண்டு ஆகஸ்ட் மாதம் ரஜினிகாந்த், மோகன் லால், சிவராஜ் குமார், விநாயகன் மற்றும் தமன்னா ஆகியோர் நடித்த ஜெயிலர் படம் ரிலீஸாகி பெருவெற்றி பெற்றது. படத்தின் விமர்சனங்கள் கலவையாக இருந்தாலும், வசூலில் கலக்கி 600 கோடி ரூபாய்க்கு மேல் வசூல் செய்தது. இதனால் உடனடியாக ஜெயிலர் 2 உருவாகும் என தகவல்கள் பரவின.
ரஜினியும் ஜெயிலர் 2 படத்தில் நடிக்க சம்மதம் தெரிவித்ததாக சொல்லப்பட்டது. இப்போது ரஜினி வேட்டையன் மற்றும் லோகேஷ் இயக்கும் ரஜினி 171 ஆகிய படங்களில் நடித்து வருகிறார். அதன் பிறகு ஜெயிலர் 2 தொடங்கும் என சொல்லப்பட்டது. அதையும் சன் பிக்சர்ஸ் நிறுவனமே தயாரிக்கும் என சொல்லப்பட்டது.
ஆனால் இதுவரை இதுபற்றி எந்தவொரு அதிகாரப்பூர்வ தகவலும் வெளியாகவில்லை. இந்நிலையில் சமீபத்தில் நெல்சனுக்கு பிறந்தநாள் வாழ்த்துகள் சொன்ன ரஜினியின் மக்கள் தொடர்பாளர் ரியாஸ் கே அஹமது அவரது ட்வீட்டில் நெல்சனுக்கு வாழ்த்துகளை சொல்லிவிட்டு “ஜெயிலர் 2 “ என்ற ஹேஷ்டேக்கையும் இணைத்துள்ளார். இதன் மூலம் ஜெயிலர் 2 உருவாவது உறுதியாகியுள்ளது.
