மலையாள திரையுலகின் பிரபல நடிகரும், இயக்குனருமான ப்ரித்விராஜ் சமீபத்தில் நடிகர் கமல்ஹாசனின் ஒரு படத்தை குறிப்பிட்டு உலக அளவில் முக்கியமான படங்களில் ஒன்று என தெரிவித்துள்ளார்.
மலையாள திரையுலகில் மட்டுமல்லாது தமிழ், தெலுங்கு உள்ளிட்ட சினிமாக்களிலும் பிரபல நடிகராக விளங்கி வருபவர் பிருத்விராஜ். நடிகராக மட்டுமல்லாமல் இயக்குனராகவும் பல படங்களை இயக்கியுள்ள ப்ரித்விராஜ் சமீபத்தில் இயக்கிய மோகன்லால் நடித்த லூசிஃபர் திரைப்படம் பாக்ஸ் ஆபீஸ் வெற்றியை பெற்றது.
சமீபத்தில் திரைப்படங்கள் குறித்து பேசியபோது நடிகர் கமல்ஹாசன் நடித்து வெளியான மைக்கெல் மதன காமராஜன் குறித்து பேசிய ப்ரித்விராஜ் ”ஒரு சில படங்கள்தான் உங்களை மகிழ்விக்கும். அந்த வரிசையில் மைக்கெல் மதன காமராஜன் முக்கியமான ஒன்று. இது உலக சினிமாக்களில் முக்கியமான ஒரு படம்” என தெரிவித்துள்ளார்.
கமல்ஹாசன் நான்கு வேடங்களில் நடித்த இந்த படத்தை சிங்கிதம் சீனிவாச ராவ் இயக்கினார். அப்போதைய காலக்கட்டதில் பெரும் வசூலை குவித்த இந்த படத்தின் 30 ஆண்டுகள் அடுத்த ஆண்டுடன் நிறைவடைவது குறிப்பிடத்தக்கது.