அர்ஜுன் ரெட்டி படத்தின் மூலம் கவனம் பெற்ற இயக்குனர் சந்தீப் ரெட்டி வாங்கா, ரன்பீர் கபூரைக் கதாநாயகனாக வைத்து இயக்கிய அனிமல் திரைப்படம் மிகப்பெரிய வெற்றியைப் பெற்றது. அனிமல் படம் ஆணாதிக்கக் கருத்துகள் விதந்தோதுவதாக விமர்சனங்கள் எழுந்துள்ளன. ஆனாலும் இந்த படம் 900 கோடி ரூபாய் அளவுக்கு வசூலித்தது.
அவர் இயக்கிய அர்ஜுன் ரெட்டி படத்தின் மீதும் இந்த விமர்சனம் எழுந்தது குறிப்பிடத்தக்கது. ஆனாலும் அவர் படங்கள் வணிக ரீதியாக வெற்றி பெறுவதால் அவர் இயக்கத்தில் நடிக்க முன்னணி கதாநாயகர்கள் ஆர்வமாக இருக்கிறார்கள். அடுத்து அவர் பிரபாஸின் 25 ஆவது படமான ஸ்பிரிட் என்ற படத்தை இயக்க உள்ளார். இந்த படம் ஒரு காவல்துறை அதிகாரியைப் பற்றிய கதை என சொல்லப்படுகிறது.
ஸ்பிரிட் படத்துக்காக தன்னுடைய உடல் அமைப்பை முழுவதுமாக மாற்ற உள்ளாராம் பிரபாஸ். அதனால் அந்த படத்துக்கு முன்பாக தான் நடித்துவரும் இரு படங்களின் ஷூட்டிங்கை முழுவதும் நிறைவு செய்யவுள்ளார். அதன் பின்னர் இரண்டு மாதங்கள் உடல்பயிற்சி மற்றும் டயட் மேற்கொள்ள உள்ளாராம். அதனால் இந்த ஆண்டு இறுதியில் அக்டோபரில்தான் ‘ஸ்பிரிட்’ படத்தின் ஷூட்டிங் தொடங்கும் என சொல்லப்படுகிறது.
