லிங்குசாமி தயாரிப்பில் ஒரு படத்தில் நடிகர் ராகவா லாரன்ஸ் நடிக்க உள்ளதாக சொல்லப்படுகிறது.
மேயாத மான் படத்தின் மூலமாக தமிழ் சினிமாவில் புகழ் வெளிச்சம் பெற்றவர் இயக்குனர் ரத்னகுமார். இதையடுத்து அவர் பெயரில் பெரிய அளவில் நம்பிக்கை ஏற்பட்டது. ஆனால் அதன் பின்னர் அவர் இயக்கிய ஆடை மற்றும் குலுகுலு ஆகிய இரண்டு படங்களும் ரசிகர்களை ஏமாற்றின.
இயக்குனர் லோகேஷ் கனகராஜின் கதை இலாகாவில் முக்கிய நபராக இருந்து வரும் ரத்னகுமார் தற்போது ராகவா லாரன்ஸ் நடிப்பில் ஒரு படத்தை இயக்க ஒப்பந்தம் ஆகியுள்ளார். இந்த படம் ருத்ரன் மற்றும் சந்திரமுகி 2 ஆகிய படங்களை லாரன்ஸ் முடித்ததும் தொடங்கும் என சொல்லப்படுகிறது.
இந்த படத்தைப் பற்றிய மேலும் சில சுவாரஸ்யமான தகவல்கள் தற்போது வெளியாகியுள்ளன. இயக்குனர் மற்றும் தயாரிப்பாளரான லிங்குசாமி கடுமையான பொருளாதார சுமையில் சிக்கியுள்ள நிலையில் அவருக்கு உதவும் விதமாக லாரன்ஸ் இந்த படத்தை அவர் தயாரிக்க ஒப்புக்கொண்டுள்ளாராம். அதுபோல தொடர்ந்து 2 தோல்விப் படங்களைக் கொடுத்த இயக்குனர் ரத்னகுமாருக்காக இந்த படத்தின் கதையை லோகேஷ் கனகராஜ் எழுத உள்ளதாகவும் சொல்லப்படுகிறது.