ஒரே நேரத்தில் இரண்டு மொழிகளில் உருவாகும் ‘கஜினி 2’.. முருகதாஸ் கொடுத்த அப்டேட்!

நடிகர் சூர்யா நடிப்பில் ஏ ஆர் முருகதாஸ் இயக்கிய கஜினி திரைப்படம் மிகப்பெரிய வெற்றி பெற்றது. இந்த திரைப்படத்தில் முதலில் அஜித் நடிப்பதாக இருந்து பின்னர் அதிலிருந்து வெளியேறினார். அதன் பின்னர் சூர்யா, அசின் மற்றும் நயன்தாரா காம்பினேஷனில் இந்த படம் உருவானது. படம் வெளியான போது மிகப்பெரிய அளவில் கவனம் ஈர்த்தது. குறிப்பாக சூர்யா, அசின் ஜோடியின் காதல் காட்சிகளும் படத்தின் பாடல்களும் ரசிகர்களால் சிலாகிக்கப்பட்டன.

கஜினி படம் மிகப்பெரிய வெற்றி பெற்றதை அடுத்து பாலிவுட்டில் ரீமேக் செய்யப்பட்டது. பாலிவுட்டில் முதல் முதலில் 200 கோடி ரூபாய் வசூல் செய்த படம் என்ற சாதனையை கஜினி நிகழ்த்தியது. இதையடுத்து கஜினி திரைப்படம் வெளியாகி 20 ஆண்டுகள் கழித்து தற்போது அதன் இரண்டாம் பாகத்தை உருவாக்க ஏ ஆர் முருகதாஸ் முடிவெடுத்துள்ளதாக சொல்லப்படுகிறது.

இது சம்மந்தமாக சூர்யா மற்றும் ஆமிர்கான் ஆகிய இருவரோடும் முருகதாஸ் பேச்சுவார்த்தை நடத்தி வருவதாக சொல்லப்படுகிறது. ஒரே நேரத்தில் தமிழ் மற்றும் இந்தி என இருமொழிகளில் இந்த படம் உருவாக வாய்ப்புள்ளதாகவும் சொல்லப்படுகிறது. படத்தை அல்லு அர்ஜுனின் தந்தை அல்லு அரவிந்தின் கீதா ஆர்ட்ஸ் நிறுவனம் தயாரிக்கும் என சொல்லப்படுகிறது.