விடாமுயற்சி படத்துடன் ஷங்கரின் கேம் சேஞ்சர் திரைப்படம்!

அஜித், இப்போது மகிழ் திருமேனி இயக்கும் விடாமுயற்சி மற்றும் ஆதிக் இயக்கும் ‘குட் பேட் அக்லி’ஆகிய திரைப்படங்களில்  நடித்து  வருகிறார். விடாமுயற்சி படத்தின் ஷூட்டிங் சில மாதங்களாக லைகா நிறுவனத்தின் பொருளாதார பிரச்சனை காரணமாக நிறுத்தி வைக்கப்பட்ட நிலையில் மீண்டும் தொடங்கி நிறைவடைந்துள்ளது.

படத்தில் அஜித்தோடு, அர்ஜுன், ஆர்வ, த்ரிஷா, ரெஜினா உள்ளிட்ட பலர் நடித்துள்ளனர். ஓம் பிரகாஷ் ஒளிப்பதிவாளராகப் பணியாற்ற அனிருத் இசையமைக்கிறார். இந்நிலையில் இந்த படம் தீபாவளியை முன்னிட்டு அக்டோபர் 31 ஆம் தேதி வெளியாகும் என எதிர்பார்க்கப்பட்டது. ஆனால் சமீபத்தில் ஒரு விருது வழங்கும் நிகழ்ச்சியில் பேசிய அர்ஜுன் விடாமுயற்சி திரைப்படம் டிசம்பரில் வெளியாகும் என அறிவித்துள்ளார்.

டிசம்பர் தொடக்கத்தில் புஷ்பா 2 திரைப்படம் வெளியாக உள்ளதால், டிசம்பர் 20 ஆம் தேதிதான் விடாமுயற்சி ரிலீஸ் ஆகும் என சொல்லப்படுகிறது. இந்நிலையில் அதே தேதியில் ஷங்கரின் ‘கேம்சேஞ்சர்’ திரைப்படமும் வெளியாக உள்ளதாக இசையமைப்பாளர் தமன் அறிவித்துள்ளார். கேம் சேஞ்சர் திரைப்படம் தெலுங்குப் படமாக உருவானாலும் தமிழிலும் டப் செய்யப்பட்டு ரிலீஸாகிறது என்பதால் கணிசமான திரைகள் அதற்கு ஒதுக்கப்படும் என தெரிகிறது.