அஜித் நடித்துள்ள ‘விவேகம்’ படத்தை, சென்சார் போர்டு மெம்பர்கள் இன்று பார்க்கின்றனர்.
சிவா இயக்கத்தில் அஜித் நடித்துள்ள படம் ‘விவேகம்’. காஜல் அகர்வால் ஹீரோயினாக நடித்துள்ள இதில், அக்ஷரா ஹாசன், விவேக் ஓபராய் இருவரும் முக்கிய கேரக்டரில் நடித்துள்ளனர். சத்யஜோதி ஃபிலிம்ஸ் சார்பில் டி.ஜி.தியாகராஜன் தயாரிக்க, அனிருத் இசையமைத்துள்ளார். ஆகஸ்ட் 10ஆம் தேதி இந்தப் படம் ரிலீஸாகும் என அறிவிக்கப்பட்டது.
ஆனால், சென்சார் முறையில் சில மாற்றங்களைக் கொண்டு வந்ததால், சென்சார் செய்ய தாமதமாகும் என்ற பேச்சு கிளம்பியது. எனவே, படத்தின் ரிலீஸும் தள்ளிப்போகும் என்றார்கள். இந்நிலையில், ஆகஸ்ட் 10ஆம் தேதி படம் கண்டிப்பாக ரிலீஸ் ஆகும் என ட்விட்டரில் தெரிவித்துள்ளார் அக்ஷரா ஹாசன். நமக்கு கிடைத்த தகவல்படி, இன்று (திங்கட்கிழமை) படத்தைப் பார்க்கின்றனர் சென்சார் அதிகாரிகள். எனவே, எந்த சர்ட்டிஃபிகேட் கிடைத்தாலும் படத்தைத் திட்டமிட்டபடி ரிலீஸ் செய்துவிடுவார்கள் என்கின்றார்கள். கடந்த 5 வருடங்களில், அஜித் படம் ‘ஏ’ சர்ட்டிஃபிகேட் வாங்கவில்லை என்பது குறிப்பிடத்தக்கது.
