புரோ கபடி 2024: தமிழ் தலைவாஸ் அபார வெற்றி.. புள்ளி பட்டியலில் முன்னேற்றம்..!

புரோ கபடி போட்டிகள் கடந்த சில நாட்களாக ஹைதராபாத்தில் நடந்து வரும் நிலையில், நேற்று நடந்த போட்டியில் தமிழ் தலைவாஸ் அணி புனே அணியை வீழ்த்தி, புள்ளி பட்டியலில் முன்னேறியுள்ளது.

நேற்றைய போட்டியில், இரு அணிகளும் சமமான பலத்தில் விளையாடிக் கொண்டிருந்த நிலையில், இறுதியில் தமிழ் தலைவாஸ் அணி சுதாரித்து விளையாடியதன் காரணமாக 35 புள்ளிகள் எடுத்து வெற்றி பெற்றது. புனே அணி 30 புள்ளிகள் மட்டுமே பெற்றது.

நேற்று நடந்த இன்னொரு போட்டியில், குஜராத் அணியை மும்பை அணி வீழ்த்தியது. மும்பை அணி 33 புள்ளிகள், குஜராத் அணி 27 புள்ளிகள் பெற்றுள்ளன என்பது குறிப்பிடத்தக்கது. நேற்றைய போட்டிகளில் முடிவுக்கு பின்னர், தமிழ் தலைவாஸ் அணி 10 புள்ளிகளுடன் நான்காவது இடத்தில் உள்ளது. உத்தரபிரதேசம், ஜெய்ப்பூர் ஆகிய அணிகளும் 10 புள்ளிகள் இருந்தாலும், இரண்டாவது மற்றும் மூன்றாவது இடங்களை பிடித்துள்ளன.

புனே அணி நேற்றைய போட்டியில் தோல்வியடைந்தபோதிலும், 11 புள்ளிகளுடன் முதல் இடத்தில் உள்ளது. டெல்லி மற்றும் குஜராத் அணிகள் ஐந்தாவது மற்றும் ஆறாவது இடங்களில் உள்ளன. இன்று, பெங்கால் மற்றும் உத்தரபிரதேச அணிகளுக்கு இடையிலான போட்டி நடைபெற உள்ளது என்பது குறிப்பிடத்தக்கது.

Edited by Siva