பீலேவின் சாதனையை முறியடித்த மெஸ்சி! – மோதி விளையாடும் ஆடு!!

லா லிகா போட்டிகளில் பார்சிலோனா அணிக்காக விளையாடி வரும் மெஸ்சி நேற்றைய ஆட்டத்தில் அடித்த கோல் மூலமாக பீலேவின் சாதனையை முறியடித்துள்ளார்.

கால்பந்தாட்ட விளையாட்டில் தற்போதைய போட்டிகளில் ஜாம்பவானாக அறியப்படுபவர் லியோனல் மெஸ்சி. தொடர்ந்து கடந்த 17 ஆண்டுகளாக பார்சிலோனா கால்பந்தாட்ட அணிக்காக விளையாடி வரும் மெஸ்சி பார்சிலோனா அணி ரசிகர்களின் கனவு நாயகனாக உள்ளார். இவரை ரசிகர்கள் செல்லமாக GOAT என்று அழைப்பது வழக்கம்.. சமீபத்தில் வெலன்சியா அணியுடன் நடந்த போட்டியில் அடித்த கோல் மூலம் பீலேவின் சாதனையை சமன்செய்தார்.

இந்நிலையில் நேற்று நடைபெற்ற லா லிகா போட்டியில் வெலடொலிட் அணியை எதிர்கொண்ட பார்சிலோனா அணி 0-3 என்ற கணக்கில் வெற்றியை கைப்பற்றியது. இந்த போட்டியில் பார்சிலோனாவின் சக வீரர்கள் இரண்டு கோல்கள் அடித்திருந்த நிலையில் 65வது நிமிடத்தில் இறங்கிய மெஸ்சி மூன்றாவது கோலை அடித்தார்.

இதற்கு முன்னதாக 643 கோல்கள் அடித்து ஒரே க்ளப்காக விளையாடி அதிக கோல்கள் அடித்த பீலேவின் சாதனையை சமன்செய்த மெஸ்சி நேற்றைய கோல் மூலமாக பீலேவின் சாதனையை முறியடித்துள்ளார். உலக அளவில் ஒரே க்ளப்காக அதிகமாக கோல்கள் (644) அடித்த வீரராக மெஸ்சி சாதனை புரிந்துள்ளார்.