கிரிக்கெட் களத்தில் இறங்கும் சேவாக், விராத் கோஹ்லியின் குடும்ப வாரிசுகள்..! ஏலப்பட்டியலில் இடம்..!

வருகிற ஜூலை 5-ஆம் தேதி நடைபெறும் டெல்லி பிரீமியர் லீக்  ஏலத்தில், கிரிக்கெட் உலகின் சில பிரபலமான குடும்பங்களை சேர்ந்த இளம் வீரர்கள் களமிறங்க உள்ளனர். விராட் கோலியின் அண்ணன் விகாஸ் கோலியின் மகன் ஆர்யாவீர் கோலி மற்றும் முன்னாள் அதிரடி வீரர் வீரேந்தர் சேவாக்கின் மகன் ஆர்யாவீர் சேவாக் ஆகியோர் ஏலப் பட்டியலில் இடம் பிடித்துள்ளனர்.

ஆர்யாவீர் சேவாக், டெல்லி 19 வயதுக்குட்பட்டோர் பிரிவில் மேகாலயாவுக்கு எதிராக 297 ரன்கள் குவித்து அசத்தியவர். அவரது இளைய சகோதரர் வேதாந்த் சேவாக் டெல்லி 16 வயதுக்குட்பட்டோர் அணிக்காக ஆஃப்-ஸ்பின்னராக விளையாடுகிறார். ஆர்யாவீர் கோலி ஒரு லெக் ஸ்பின்னர். அவர் விராத் கோஹ்லி போலவே ராஜ்குமார் சர்மாவிடம் பயிற்சி பெறுகிறார். கடந்த சீசனில் டெல்லி 16 வயதுக்குட்பட்டோர் அணியில் இவரும் இடம்பெற்றிருந்தார்.

இந்த ஆண்டு டெல்லி பிரீமியர் லீக்கில் அவுட்டர் டெல்லி மற்றும் புது டெல்லி என இரண்டு புதிய அணிகள் சேர்க்கப்பட்டுள்ளன. கடந்த 2024 DPL T20 போட்டியில், ஈஸ்ட் டெல்லி ரைடர்ஸ் அணி சவுத் டெல்லி சூப்பர்ஸ்டார்ஸை மூன்று ரன்கள் வித்தியாசத்தில் வீழ்த்தி சாம்பியன் பட்டம் வென்றது. இப்போட்டிகளில் ஆயுஷ் படோனி, அனுஜ் ராவத், ரிஷப் பந்த் போன்ற பிரபல வீரர்கள் பங்கேற்றது குறிப்பிடத்தக்கது.

Edited by Siva