இந்திய அணியின் நட்சத்திர பந்துவீச்சாளர் ஜாஸ்ப்ரித் பூம்ரா டிவி தொகுப்பாளினி ஒருவரை திருமணம் செய்ய உள்ளதாக செய்திகள் பரவி வருகின்றன.
இந்தியா வந்துள்ள இங்கிலாந்து அணி தற்போது டெஸ்ட் தொடரில் விளையாடி வருகிறது. அதையடுத்து 5 டி 20 போட்டிகள் மற்றும் 3 ஒருநாள் போட்டிகளில் விளையாட உள்ளது. அடுத்து வரும் டி 20 மற்றும் ஒருநாள் போட்டிகளில் இந்திய அணியின் முக்கிய வேகப்பந்து வீச்சாளர் பூம்ரா விளையாட மாட்டார் என சொல்லப்படுகிறது.
ஏற்கனவே நான்காவது டெஸ்ட் போட்டியில் இருந்து சொந்த காரணங்களுக்காக அவர் விலகிக்கொண்டார் என்று சொல்லப்பட்டது. ஐபிஎல் மற்றும் ஆஸி தொடரால் பூம்ராவுக்கு மேலும் வேலைப்பளு கொடுக்கவேண்டாம் என்பதால் இந்த முடிவு எடுக்கப்பட்டுள்ளதாக சொல்லப்படுகிறது. ஆனால் பூம்ராவின் விலகலுக்கு வேறு சில காரணங்களும் சொல்லப்படுகின்றன.
பூம்ராவுக்கு ஐபிஎல் தொடருக்கு முன்னதாகவே திருமணம் செய்ய ஏற்பாடுகள் நடந்து வருவதாக சொல்லப்படுகிறது. இதனால்தான் இப்போது அவர் விருப்ப விடுப்பு எடுத்துள்ளதாக சொல்லப்படுகிறது. அதே நேரத்தில் முன்னர் பூம்ராவின் காதலி என்று கிசுகிசுக்கப்பட்ட நடிகை அனுபமா பரமேஸ்வரன் தன்னுடைய இன்ஸ்டாகிராம் பக்கத்தில் ‘எனக்கு இனிய விடுமுறை’ என்று குறிப்பிட்டு ஒரு புகைப்படத்தையும் பதிவிட்டுள்ளார். இதனால் ரசிகர்கள் மீண்டும் பூம்ரா –அனுபமா காதல் துளிர்விட்டுள்ளதாகப் பேச ஆரம்பித்துள்ளனர். ஆனால் இந்த செய்தி முற்றிலும் உண்மைக்குப் புறம்பானது என அனுபமாவின் தாயார் மறுத்திருந்தார்.
இந்நிலையில் இப்போது பூம்ராவுக்கும் தொலைக்காட்சி தொகுப்பாளினி சஞ்சனா கணேசனுக்கும் மார்ச் 15 ஆம் தேதி கோவாவில் திருமணம் நடக்க உள்ளதாக செய்திகள் வெளியாக ஆரம்பித்துள்ளன. ஆனால் இந்த செய்தியும் இதுவரை அதிகாரப்பூர்வமாக அறிவிக்கப்படவில்லை.
