அதிமுக எம்.எல்.ஏ திடீர் மறைவு.. இடைத்தேர்தல் எப்போது?

கோவை மாவட்டம் வால்பாறை அதிமுக எம்எல்ஏவான அமுல் கந்தசாமி, உடல்நலக்குறைவு காரணமாக திடீரென காலமானார். இதை தொடர்ந்து, அந்த தொகுதிக்கு விரைவில் இடைத்தேர்தல் நடத்தப்படும் என எதிர்பார்க்கப்படுகிறது.

அன்னூர் பகுதியை சேர்ந்த அமுல் கந்தசாமி, கடந்த 2021 ஆம் ஆண்டு நடைபெற்ற சட்டமன்ற தேர்தலில் அதிமுக வேட்பாளராக வால்பாறை தொகுதியில் போட்டியிட்டு வெற்றி பெற்றார். 

இந்த நிலையில், கடந்த சில மாதங்களாக அவர் புற்றுநோயால் அவதிப்பட்டு வந்தார். பல்வேறு மருத்துவமனைகளில் சிகிச்சை பெற்று வந்த நிலையில், அவரது உடல்நிலை நேற்று மோசமடைந்தது. கோவை தனியார் மருத்துவமனையில் அனுமதிக்கப்பட்ட அவர் சிகிச்சை பலனின்றி நேற்று மாலை உயிரிழந்தார். அவருக்கு வயது 60.

அவரது மறைவையடுத்து, அதிமுக பொதுச் செயலாளர் எடப்பாடி பழனிசாமி உட்பட பல அதிமுக பிரமுகர்கள் நேரில் சென்று அஞ்சலி செலுத்தினர். அவரது உடல் நேற்று இரவு தகனம் செய்யப்பட்டது. இந்த நிலையில், வால்பாறை தொகுதிக்கு விரைவில் இடைத்தேர்தல் அறிவிக்கப்படும் என்று எதிர்பார்க்கப்படுகிறது.

Edited by Mahendran