எம்.பி ரவிக்குமாருக்கு சனாதனம் பற்றி என்ன தெரியும் என்று முன்னாள் ஆளுநர் தமிழிசை சௌந்தரராஜன் கேள்வி எழுப்பி உள்ளார்.
வெங்கட்பிரபு இயக்கத்தில் விஜய் நடித்துள்ள ‘தி கோட்’ திரைப்படம் இன்று வெளியாகி பெரும் வரவேற்பை பெற்றுள்ளது. தி கோட் திரைப்படம் விஜய் அரசியல் கட்சி தொடங்கிய பின்னர் வெளியாகியுள்ள முதல் திரைப்படம் என்பதால் இந்த படத்தை ரசிகர்கள் கொண்டாடி வருகின்றனர்.
இந்நிலையில் தி கோட் படத்தின் தலைப்பு குறித்து விடுதலை சிறுத்தைகள் கட்சி எம்பி ரவிக்குமார், புதிய சர்ச்சை ஒன்றை எழுப்பி உள்ளார். இது குறித்து தனது எக்ஸ் பக்கத்தில் பதிவிட்டுள்ள அவர், விஜய் படத்தின் தலைப்பில் ‘சனாதனம்’? The Greatest of all time என்பது ஒரு சனாதனக் கருத்தில்லையா?
‘காலமெல்லாம் பெரியது இதுதான்’ என்றால் காலம் மாறினாலும் இது மாறாது என்றுதானே அர்த்தம்! ‘என்றும் மாறாதது’ என்பதுதானே ‘சனாதனம்’ என்ற சொல்லின் பொருள்! இதைத் தெரிந்துதான் விஜய் படத்துக்குத் தலைப்பு வைத்தார்களா? என்று எம்பி ரவிக்குமார் கேள்வி எழுப்பியுள்ளார்.
அவருக்கு பதிலடி கொடுத்துள்ள, முன்னாள் ஆளுநர் தமிழிசை சௌந்தரராஜன், சனாதனம் பற்றி ரவிகுமாருக்கு என்ன தெரியும் என்று கேள்வி எழுப்பி உள்ளார். சனாதனம் பற்றி ரவிக்குமாருக்கு தெரியவில்லை என்பதை பட்டவர்த்தனமாக ஒப்புக் கொண்டுள்ளார் என்று தமிழிசை கூறியுள்ளார்.
பாஜகவிடம் தான் சமாதானம் பார்த்தார்கள் என்றால் இப்போது விஜய்யிடம் சனாதனம் பார்க்கிறார்கள் என்று தமிழிசை சௌந்தரராஜன் தெரிவித்துள்ளார்.
