சென்னை விமான நிலையத்தில் இருந்து கிளம்பும் ஐந்து விமானங்கள் மற்றும் சென்னைக்கு வர வேண்டிய ஐந்து விமானங்கள் என மொத்தம் பத்து விமானங்கள் இன்று ரத்து செய்யப்பட்டதாக வெளிவந்திருக்கும் தகவல், பயணிகள் மத்தியில் பெரும் அதிருப்தியை ஏற்படுத்தியுள்ளது.
சென்னையில் உள்நாட்டு விமான நிலையத்தில் இன்று ஒரே நாளில் விமானங்கள் ரத்து செய்யப்பட்டதால் பயணிகள் அதிர்ச்சி அடைந்ததாகவும், இதனால் விமான நிலைய அதிகாரிகளுக்கும் பயணிகளுக்கும் இடையே வாக்குவாதம் ஏற்பட்டதாகவும் கூறப்படுகிறது.
சென்னையில் இருந்து கொல்கத்தா, புவனேஷ்வர், பெங்களூர், திருவனந்தபுரம் மற்றும் சிலிகுரி ஆகிய ஐந்து நகரங்களுக்கு செல்ல வேண்டிய விமானங்கள் ரத்து செய்யப்பட்டுள்ளன. அதேபோல், பெங்களூரு, திருவனந்தபுரம், புவனேஸ்வர், கொல்கத்தா, சிலிகுரி ஆகிய நகரங்களில் இருந்து சென்னை வரும் விமானங்களும் ரத்து செய்யப்பட்டுள்ளன.
எந்தவித முன் அறிவிப்பும் இன்றி ஒரே நாளில் சென்னையில் 10 விமானங்கள் ரத்து செய்யப்பட்டது, பெரும் அதிர்ச்சியை ஏற்படுத்திய நிலையில், முன்பதிவு செய்து விமானத்திற்காக காத்திருந்த பயணிகள் பெரும் அவதிக்குள்ளாகி உள்ளனர்.
