நடிகர் ரஜினிகாந்த அரசியலுக்கு வருவது உறுதி என காந்திய மக்கள் இயக்கத்தை நடத்தும் தமிழருவி மணியன் கூறியுள்ளார்.
நடிகர் ரஜினிகாந்த் அரசியலுக்கு வருவது பற்றி தனது ரசிகர் மன்ற நிர்வாகிகள், தன்னுடைய நலம் விரும்பிகள், நெருக்கமான அரசியல் தலைவர்கள் மற்றும் பத்திரிக்கையாளர்கள் ஆகியோரிடம் அவர் ஆலோசனை செய்து வருகிறார்.
இந்நிலையில் அவரது வீட்டில் பல அரசியல் பிரமுகர்கள் சந்தித்து பேசி வருகின்றனர். அதிமுகவிலிருந்து விலகிய நடிகர் ஆனந்தராஜ் சமீபத்தில் ரஜினியை சந்தித்து பேசினார். அதன் பின் காந்திய மக்கள் இயக்கத்தை வழிநடத்தும் தமிழருவி மணியன் ரஜினியை சந்தித்து பேசினார்.
அதன் பின் செய்தியாளர்களிடம் பேசிய அவர் “ ரஜினியின் வீட்டிற்குள் நுழைந்தவுடன் அங்கே மிகப்பெரிய காந்தி புகைப்படம் வைக்கப்பட்டுள்ளது. காந்தியின் கொள்கைகள் தனக்கு பிடிக்கும் என ரஜினி என்னிடம் கூறினார்.
தற்போதுள்ள அரசியல் சூழ்நிலை குறித்து அவர் என்னிடம் விவாதித்தார். அரசியலுக்கு வருவது என்பதில் அவர் தெளிவாக இருக்கிறார். நிச்சயம் அவர் அரசியலுகு வருவார். ஊழலற்ற நல்லாட்சியை அவர் தருவார். காந்திய மக்கள் இயக்கம் அவருக்கு துணை நிற்கும்” என அவர் தெரிவித்தார்.
