பாஜக ஆட்சி அமைத்தால் அதன் அமைச்சரவையில் அதிமுக இடம்பெறுவது குறித்து தகவல் வெளியிட்டுள்ளார் துணை முதல்வர் ஓ.பன்னீர்செல்வம்.
நாடு முழுவதும் மக்களவை தேர்தல் கடந்த ஏப்ரல் 11 ஆம் தேதி தொடங்கி மே 19 ஆம் தேதியோடு முடிவடைந்தது. தேர்தலுக்கு பின்னர் எக்சிட்போல் முடிவுகளும் வெளியிடப்பட்டன. அதில் பாஜக மீண்டும் ஆட்சி அமைக்கும் என கணிப்புகள் தெரிவிக்கின்றன. அதே போல் தமிழகத்தில் திமுக அதிக தொகுதிகளில் வெற்றி பெரும் என தெரிவிக்கப்பட்டுள்ளது.
இந்நிலையில், பாஜக வெற்றி பெற்று ஆட்சி அமைத்தால் அதன் அமைச்சரவையில் அதிமுக இடம் பெறுமா என துணை முதல்வர் ஓ.பன்னீர் செல்வத்திடம் கேட்கப்பட்டது. இதற்கு பதில் அளித்த அவர், மே 23 ஆம் தேதி நடக்கும் அதிமுக தலைமைக்கழக நிர்வாகிகள் கூட்டத்தில் இது தொடர்பாக முடிவு எடுக்கப்படும் என தெரிவித்தார்.
இதற்கு முன்னர் மத்தியில் எந்த ஆட்சி அமைந்தாலும் அதில் திமுக அங்கம் வகிக்குமா? என செய்தியாளர் எழுப்பிய கேள்விக்கு பதில் அளித்த திமுக தலைவர் மு.க.ஸ்டாலின், 23 ஆம் தேதி வாக்கு எண்ணிக்கை முடிந்த பிறகு அதற்குரிய விளக்கத்தை அளிக்கிறேன் என பதில் அளித்தார் என்பது குறிப்பிடத்தக்கது.