முதல் நாளிலேயே ஸ்பெல்லிங் மிஸ்டேக்: நியூஸ்ஜெ டிவியை கிண்டல் செய்யும் நெட்டிசன்கள்

அதிமுகவின் அதிகாரபூர்வ தொலைக்காட்சியான நியூஸ் ஜெ தொலைக்காட்சியின் லோகோ மற்றும் ஆப் வெளியீட்டு விழா இன்று நடைபெற்றது. இதில் முதலமைச்சர் எடப்பாடி பழனிச்சாமி மற்றும் துணை முதல்வர் ஓ.பன்னீர்செல்வம் ஆகியோர் கலந்து கொண்டனர்.

இந்த விழாவில் முதல்வர் மற்றும் துணை முதல்வர் பேசியதை நியூஸ்ஜெ டுவிட்டர் பக்கத்தில் செய்தியாக பதிவாகி வருகிறது. அதில் ஒரு டுவீட்டில் 'நாட்டை ஆளும் மன்னனின் வால் முனையை விட பேனா முனை கூர்மையானது என துணை முதல்வர் பேசியதாக ஒரு டுவீட் பதிவு செய்யப்பட்டுள்ளது.

'வாள் முனை' என்பதற்கு பதிலாக 'வால்முனை' என்று டுவிட்டில் பதிவு செய்யப்பட்டிருக்கும் ஸ்பெல்லிங் மிஸ்டேக்கை டுவிட்டர்வாசிகள் பலமுறை சுட்டிக்காட்டிய பின்னர் தவறு திருத்தப்பட்டுள்ளது என்பது குறிப்பிடத்தக்கது. இந்த நிலையில் முதல் நாளிலேயே ஸ்பெல்லிங் மிஸ்டேக்கா? என நெட்டிசன்கள் கலாய்த்து வருகின்றனர்.