நாளை அந்தமான் கடல் பகுதியில் காற்றழுத்த தாழ்வு பகுதி: இந்திய வானிலை ஆய்வு மையம்..!

வங்கக்கடலில் உள்ள அந்தமான் பகுதியில் நாளை காற்றழுத்த தாழ்வு மையம் உருவாக இருப்பதாக இந்திய வானிலை ஆய்வு மையம் தெரிவித்துள்ளது.

மத்திய அந்தமான் கடல் பகுதியில் வளிமண்டல மேலடுக்கு சுழற்சி நிலவி வருவதாகவும், கடல் மட்டத்துக்கு 5.8 கிலோமீட்டர் உயரத்தில் நிலவும் இந்த வளிமண்டல சுழற்சி மத்திய வங்க கடல் பகுதி மற்றும் அதை ஒட்டிய வடக்கு அந்தமான் பகுதியில் காற்றழுத்த தாழ்வு பகுதியாக உருவாக வாய்ப்பு உள்ளது என்று இந்திய வானிலை ஆய்வு மையம் தெரிவித்துள்ளது.

இந்த காற்றழுத்த தாழ்வு பகுதி வடமேற்கு திசையில் நகர்ந்து அக்டோபர் 23ஆம் தேதி காற்றழுத்த தாழ்வு மண்டலமாக வலுப்பெற வாய்ப்பு இருப்பதாக தெரிவிக்கப்பட்டுள்ளது.

இதன் காரணமாக, தமிழகத்தில் அக்டோபர் 20 முதல் 24ஆம் தேதி வரை இடி, மின்னலுடன் கூடிய மழை பெய்யும் என்று அறிவிக்கப்பட்டுள்ளது. இன்று, அதாவது அக்டோபர் 20ஆம் தேதி, தர்மபுரி, சேலம், கிருஷ்ணகிரி, ஈரோடு, திருப்பத்தூர், வேலூர் ஆகிய மாவட்டங்களிலும் நாளை, அதாவது அக்டோபர் 21ஆம் தேதி, கோவை, திருப்பூர், திண்டுக்கல், நீலகிரி, தர்மபுரி, கிருஷ்ணகிரி, சேலம், பெரம்பலூர் ஆகிய மாவட்டங்களிலும் கன மழை பெய்ய வாய்ப்பு உள்ளதாக அறிவிக்கப்பட்டுள்ளது.

சென்னையை பொருத்தவரை வானம் மேகமூட்டத்துடன் காணப்படும் என்றும், சில இடங்களில் இடி, மின்னலுடன் கூடிய மழை பெய்யும் என்று சென்னை வானிலை ஆய்வு மையம் தெரிவித்துள்ளது.

Edited by Siva