கமல்ஹாசன் நடித்த இந்தியன் 2 திரைப்படம் இன்று வெளியாகி உள்ள நிலையில் இந்த படத்தின் ரிலீஸ் ஆனதை கொண்டாட ஐந்து கிலோ கற்பூரத்தை ரசிகர்கள் ஏற்றிய நிலையில் அது தீ விபத்தாக மாறிய சம்பவம் புதுவையில் நடந்துள்ளது.
கமல்ஹாசன் நடிப்பில் ஷங்கர் இயக்கத்தில் உருவாகிய இந்தியன் 2 திரைப்படம் இன்று தமிழகம் உள்பட உலகம் முழுவதும் ரிலீஸ் ஆகி உள்ளது. இந்த படத்திற்கு கலவையான விமர்சனங்கள் வெளிவந்து கொண்டிருக்கின்றன.
இந்த நிலையில் இந்தியன் 2 திரைப்பட ரிலீஸை கொண்டாடும் வகையில் புதுவையில் உள்ள ஒரு திரையரங்கிற்கு வெளியே ஐந்து கிலோ எடை கொண்ட கற்பூரத்தை கமல் ரசிகர்கள் கொளுத்தினர்.
அந்த கற்பூரம் கொழுந்து விட்டு எரிந்து கொண்டிருந்த நிலையில் திடீரென அருகில் இருந்த பேனரிலும் தீப்பிடித்ததை அடுத்து பரபரப்பு ஏற்பட்டுள்ளது. உடனடியாக அங்கு பாதுகாப்புக்கு இருந்த போலீசார் கற்பூரம் வைக்கப்பட்டிருந்த இரும்பு ஸ்டாண்டை கீழே தள்ளி தீயை அணைத்தனர்.
இதனால் பெரும் தீ விபத்து தவிர்க்கப்பட்டது என்பது குறிப்பிடத்தக்கது. இந்த சம்பவம் அந்த பகுதியில் பெரும் பரபரப்பை ஏற்படுத்தி உள்ளது.
