தபு சங்கர் காதல் கவிதைகள்

அன்று

நீ குடை விரித்ததற்காக

கோபித்துக் கொண்டு

நின்று விட்ட மழையைப்

பார்த்தவனாகையால்

இன்று

சட்டென்று மழை

நின்றால் நீ எங்கோ

குடை விரிப்பதாகவே

நினைத்துக் கொள்கிறேன்.

---------------------------------

நீ யாருக்கோ செய்த

மௌன அஞ்சலியைப்

பார்த்ததும்..

எனக்கும்

செத்துவிடத் தோன்றியது.

---------------------------------

எனக்கு

லீப் வருடங்களைத்தான்

ரொம்ப ரொம்பப் பிடிக்கிறது.

அந்த வருடங்களில்தான்

இன்னும் ஒரு நாள்

அதிகமாக வாழலாம் உன்னோடு.

------------------------

நீ எந்த உடையிலும்

கவிதையாகத்தான் இருக்கிறாய்

சேலை கட்டியிருக்கும் போதுதான்

தலைப்புடன் கூடிய கவிதையாகிறாய்.

-------------------------

ஒரு வண்ணத்துப் பூச்சி

உன்னைக் காட்டி

என்னிடம் கேட்கிறது....

"ஏன் இந்த பூ

நகர்ந்து கொண்டே இருக்கிறது?" என்று.

- தபு சங்கர்