காங்கிரஸ் கட்சியில் சேர்ந்ததும் ராஜினாமா செய்த வினேஷ் போகத், பஜ்ரங் புனியா..!

மல்யுத்த வீரர் வினேஷ் போகத் மற்றும் பஜ்ரங் புனியா ஆகிய இருவரும் காங்கிரஸ் கட்சியில் சமீபத்தில் இணைந்த நிலையில் அவர்கள் இருவரும் தங்களது ரயில்வே துறையில் உள்ள பதவியை ராஜினாமா செய்ததாக தகவல் வெளியாகியுள்ளன.

விளையாட்டு ஒதுக்கீட்டில் சிறப்பு பணி அதிகாரிகளாக வினேஷ் போகத் மற்றும் பஜ்ரங் புனியா ஆகிய இருவரும் பணியாற்றி வந்த நிலையில் சமீபத்தில் இருவரும் ராகுல் காந்தி முன்னிலையில் காங்கிரஸ் கட்சியில் இணைந்தனர்.

இதனை அடுத்து வினேஷ் போகத் மற்றும் பஜரங் புனியா இருவரும் ரயில்வே துறை அதிகாரி பணியை ராஜினாமா செய்வதாக அறிவித்ததை அடுத்து வடக்கு ரயில்வே அந்த ராஜினாமாவை ஏற்றுக் கொள்வதாகவும் தெரிவித்துள்ளது.

இந்த நிலையில் அரியானா மாநில சட்டமன்ற தேர்தலில் ஜுலானா தொகுதியில் போட்டியிட வினேஷ் போகத்துக்கு காங்கிரஸ் கட்சி சீட்டு வழங்கி உள்ளது. அதேபோல் பஜ்ரங் புனியாவும் அரியானா சட்டசபை தேர்தலில் போட்டியிடுவார் என்று கூறப்படுகிறது.

இந்த நிலையில் இருவரும் தீவிர தேர்தல் பிரச்சாரத்தில் ஈடுபட திட்டமிட்டுள்ளதாகவும் பாஜக அரசை ஆட்சியில் இருந்து அகற்றியே தீர்வது என்பதற்கு தான் காங்கிரஸ் கட்சியில் சேர்ந்து உள்ளதாகவும் தெரிவித்துள்ளனர்.

Edited by Mahendran